Аудан әкімінің орынбасары Ш. Есжановтың төрағалығымен өткен мәжілісте елді мекендердің санитарлық тазалығы, тарихи-мәдени нысандарды күтіп ұстау және алдағы сенбілік жұмыстарын ұйымдастыру мәселелері кеңінен талқыланды.
Халықаралық ескерткіштер мен тарихи орындар күні қарсаңында аудан көлемінде ескерткіштер мен қорымдар аумағында санитарлық-тазалық жұмыстары жүргізілетін болады. Арал қаласында бұл шара Жарбол қорымында ұйымдастырылады. Аталған тазалық жұмыстарына дербес бөлім басшылары, мәслихат депутаттары, көше комитеттері, білім беру ұйымдарының жетекшілері және қоғам белсенділері қатысуы тиіс.
Мекеме басшылары мен ұжым қызметкерлері, әсіресе ер азаматтар, тазалық жұмыстарына толық қатысып, қажетті құрал-жабдықтармен қамтамасыз етілуі міндеттелді. Сонымен қатар, жиналған тұрмыстық қалдықтарды уақытылы шығару және тиісті орындарға жеткізу жұмыстарын үйлестіру тапсырылды.
Ауылдық округтерге нақты нысандар бекітіліп, әр аумақтағы тарихи орындар мен қорымдарда тазалық жұмыстары жүргізіледі. Бұл жұмыстарға арнайы техника тартылып, ұйымдасқан түрде іске асырылатын болады.
Жиында «Таза Қазақстан» экологиялық бағдарламасы аясында өткізілетін сенбілік шаралардың маңыздылығы ерекше атап өтілді. Елді мекендердің тазалығы – баршамызға ортақ міндет екені ескертіліп, барлық мекеме қызметкерлері мен тұрғындарды белсенділік танытуға шақырды.
Сондай-ақ, аудан аумағындағы санитарлық жағдай мен түнгі жарықшамдардың жұмысын тұрақты бақылауда ұстау қажеттігі айтылды. Бұл бағыттағы жұмыстар облыс әкімдігінің қатаң бақылауында екені назарға алынды.
Айта кетейік, сенбі күні елді мекен аумағында сенбілік жұмыстары ұйымдастырылса, жексенбі күні елді мекен аумағындағы қорымдарда тазалық жұмыстары жүреді.
Тазалық – мәдениеттің айнасы. Сондықтан туған жердің көркеюі мен тазалығы әрбір азаматтың жауапкершілігінде екенін ұмытпайық.
