«Халық үніне құлақ асатын мемлекет» тұжырымдамасы аясында ұйымдастырылған кездесулер тұрғындар мен жергілікті билік арасындағы ашық диалог алаңына айналды. Кездесулер барысында аудан әкімі Мемлекет басшысы мен Үкіметтің қолдауымен аудан көлемінде жүзеге асырылып жатқан әлеуметтік-экономикалық жобаларға тоқталып, елді мекендерде атқарылған жұмыстар мен алдағы жоспарларды кеңінен баяндады.
Тартоғай ауылдық округінде «Ауыл – Ел бесігі» бағдарламасы аясында М.Ғабдуллин көшесі бойындағы ескі жарық шамдары заманауи жарық бағаналарына ауыстырылды. Сонымен қатар, Кірпіш зауыты елді мекеніндегі Б.Момышұлы көшесіне орташа жөндеу жұмыстары жүргізіліп, Д.Ершохаев көшесіне ағымдағы жөндеу жасалды. Елді мекенді аяқ сумен қамтамасыз етіп отырған ұзындығы 1,5 шақырым арық арнасы тазартылды.
Қоғалы ауылдық округінде аудандық бюджет есебінен «Жастар саябағы» салынды. Ауыл тұрғындары атқарылған жұмыстарға ризашылықтарын білдіріп, аудан басшылығына қолдау көрсететіндіктерін жеткізді. Сонымен қатар, қатты тұрмыстық қалдықтар төгетін 1,5 гектар аумақ қоршалып, пайдалануға берілді. Елді мекенді аяқ сумен қамтамасыз ететін Ботабай каналының 900 метр бөлігі тазартылды. Алдағы уақытта интернет және байланыс сапасын жақсарту бағытындағы жұмыстар қолға алынбақ.
Қарғалы ауылдық округінде ауылдың кіреберіс аркасынан бастап елді мекен ішіне дейін көше жарықтандыру жүйесі орнатылып, толық іске қосылды. Сонымен қатар, ауыл шаруашылығы саласын дамыту бағытында нақты жұмыстар жүргізілуде. Атап айтқанда, екі азамат мал басын көбейту мақсатында жер телімін алу конкурсына қатысып, нәтижесінде жеңімпаз атанды. Қазіргі таңда олар 50 гектар жерді жалға алып, кәсіптерін дөңгелетуде.
Кездесу барысында аудан прокуроры Мейрамбек Маханбетжанов «Заң және тәртіп» қағидаты аясында құқықтық мәдениетті қалыптастыру, интернет алаяқтықтың, есірткі қылмыстарының және тұрмыстық зорлық-зомбылықтың алдын алу бағытында түсіндірме жұмыстарын жүргізді. Сондай-ақ тұрғындарды заң талаптарын сақтауға шақырды.
Кездесулер барысында ауыл тұрғындары өз ұсыныс-пікірлерін ортаға салып, елді мекендерді дамытуға бағытталған бастамаларға қолдау білдірді. Аудан әкімі көтерілген мәселелер кезең-кезеңімен шешімін табатынын айтып, тиісті жұмыстар тұрақты бақылауда болатынын жеткізді.
@Шиелі ауданы әкімінің баспасөз қызметі.
