Аудан тұрғындарының қауіпсіз әрі жайлы қозғалысын қамтамасыз ету мақсатында бірқатар көшелерде күрделі және орташа жөндеу жобалары кезең-кезеңімен жүзеге асырылуда.
Осыған орай, аудан әкімі Мажит Самитов Жаңақорған кентіндегі бірқатар көшелерді аралап, жол жөндеу жұмыстарының барысымен танысты. Атап айтқанда, А.Иманов және А.Мұхамеджанұлы көшелерінде жүргізіліп жатқан күрделі жөндеу, сондай-ақ Ш.Мұсахметов пен Ж.Құлымбетов көшелеріндегі жол жабынын жаңалау жұмыстарының сапасы мен қарқыны тексерілді.
Тексеру барысында аудан басшысы мердігер мекеме өкілдерімен кездесіп, атқарылып жатқан жұмыстардың сапасына ерекше назар аудару қажеттігін атап өтті. Сонымен қатар, құрылыс барысында қолданылатын материалдардың талапқа сай болуын, технологиялық талаптардың толық сақталуын және жұмыс кестесінің нақты орындалуын қатаң тапсырды.
Аудан әкімі жол құрылысы – халықтың күнделікті тұрмысымен тікелей байланысты маңызды сала екенін айтып, бұл бағыттағы әрбір жобаның сапалы әрі уақытылы аяқталуы басты міндет екенін жеткізді. Сондай-ақ, тұрғындар тарапынан туындайтын ұсыныс-пікірлерді ескеріп, жұмыстарды барынша тиімді ұйымдастыру қажеттігін ескертті.
Сонымен бірге, салаға жетекшілік ететін аудан әкімінің орынбасары Қайрат Сапарбаев мен кент әкімі Жасұлан Бейсенбековне атқарылып жатқан жұмыстарды тұрақты бақылауда ұстап, белгіленген мерзімде толық аяқталуын қамтамасыз ету тапсырылды.
Жалпы, аудандағы жол инфрақұрылымын жақсарту бағытындағы жұмыстар алдағы уақытта да жалғасып, тұрғындарға қолайлы орта қалыптастыруға және елді мекендердің көлік қатынасын дамытуға оң әсерін тигізеді деп күтілуде.
