Жалпы ұзындығы 3,192 шақырымды құрайтын айналма жолдың Жанқожа батыр көшесінен Т. Бөріқұлақов көшесіне дейінгі бір бағыттағы бөлігінде асфальт жабындысын төсеу жұмыстары толық аяқталған. Қазіргі таңда жолдың екінші бағытындағы құрылыс жұмыстары жүргізілуде.
Жобаға сәйкес айналма жол Роза Бағланова атындағы аудандық мәдениет үйі маңынан басталып, екі бағыт бойынша Т. Бөріқұлақов көшесімен қиылысатын болады.
Нысанды аралау барысында аудан әкімі құрылыс жұмыстарының сапасына ерекше назар аударды. Мердігер мекеме – «Қазалы Жолшы» ЖШС өкілдеріне және жауапты сала басшыларына жұмыстарды белгіленген талаптарға сай жүргізіп, жол сапасын қамтамасыз ету және құрылысты белгіленген мерзімде аяқтау жөнінде нақты тапсырмалар берілді.
Айналма жолдың пайдалануға берілуі Әйтеке би кентіндегі көлік қозғалысын реттеуге мүмкіндік береді. Сонымен қатар орталық көшелердегі көлік жүктемесін азайтып, тұрғындардың жүріп-тұруына қолайлы жағдай қалыптастыруға және жол қозғалысы қауіпсіздігін арттыруға ықпал етпек.
Айта кетейік, биыл Қазалы ауданында автомобиль жолдарын дамыту бағытында бірқатар жұмыстар атқарылуда.
Атап айтқанда, Әйтеке би кентіндегі 12 көшеге ағымдағы жөндеу жұмыстарын жүргізуге аудандық бюджеттен 81,6 млн теңге бөлініп, тиісті жұмыстар орындалды.
Алдағы кезеңде ауданның автомобиль жолдарын күрделі және орташа жөндеуден өткізу мақсатында 26 жоба бойынша облыстық экономика және қаржы басқармасына жалпы құны 3,7 млрд теңгені құрайтын бюджеттік өтінім жолданған.
Бұдан бөлек, Қожабақы–Аранды және «Қарлан» учаскесінен Бірлік ауылына дейінгі аудандық маңызы бар автомобиль жолдарын жөндеу жоспарланып отыр.
Жол сапасы – елді мекендердің әлеуметтік-экономикалық дамуына тікелей әсер ететін маңызды фактор. Сондықтан қолға алынған жобалардың сапалы әрі уақытылы жүзеге асуы аудан басшылығының тұрақты бақылауында.
