Қызылорда облысында 2025 жылы желшешектің 901 жағдайы тіркелген. Оның 86,5% – 14 жасқа дейінгі балалар арасында анықталды. 2024 жылмен салыстырғанда аурушаңдық көрсеткіші 146 жағдайға төмендеген.
Инфекция көзі ауру адам болып табылады, ол вирусты 100% жағдайда таратады, сондықтан ауру кезеңінде науқас пен сау адамдар арасындағы байланысты шектеу өте маңызды. Инкубациялық кезең 10-нан 21 күнге дейін созылады.
Ауру ең алдымен дене температурасының 39-40 градусқа дейін күрт көтерілуімен, бастың ауруымен сипатталады. Желшешектің ең айқын белгісі – бөртпе және қышыну. Желшешек бөртпесі тек теріде және шырышты қабаттарда ғана емес, бас терісінде де пайда болады. Науқастың сауығуы бөртпе шыққаннан 10 күннен соң басталады. Егер қызба 39 градустан асса, бала өзін нашар сезінсе, қандай да бір өзгерістер байқаған болсаңыз дәрігер көмегіне жүгіну қажет. Өзін-өзі емдеумен айналыспай, дер кезінде медициналық көмек көрсету аурудың асқынып кетуінің алдын алады. Балаларда желшешек ересектерге қарағанда жеңіл түрде өтеді, кей жағдайда ересектер асқынулардан зардап шегуі мүмкін. Желшешектен сауыққаннан кейін иммунитет қалыптасады, инфекцияның қайталануы өте сирек кездеседі.
Аурудың алдын алу мақсатында:
– науқаспен байланысты шектеу;
– науқасқа жеке ыдыс-аяқ, төсек-орын, гигиеналық керек-жарақтар бөлу;
– науқастың киімдері мен төсек-орындарын бөлек жуу;
– қайталама инфекцияның қосылуын болдырмау үшін жеке бас гигиенасын сақтау;
– үй-жайларды жиі ылғалды тазалау және желдету;
– салауатты өмір салтын ұстану.
Әлия Әбдіқайымова
Қызылорда облысының СЭБД басшы орынбасары
