Almaty.tv арнасының хабарлауынша қайғылы жағдай қалалық №2 ауруханада болған. 30 жастағы Назерке Пірімбетова перзентханаға алдын ала жатқызылған.
Туыстарының айтуынша, ол бір айдан аса бақылауда жатқанымен, жағдайы күн өткен сайын нашарлаған. Әйел бірнеше рет көмек сұрағанымен, дәрігерлер оған «шыдаңыз» деп қана жауап берген. Нәтижесінде ол сәбиін құшағына алмақ түгілі, көре де алмады — бала анасының жатырында жан тапсырыпты.
«Оны бес-алты рет тексерді, КТ-сы үнемі нашар болды. Түнде мазасы қашып, қиналды. Мұның бәрін дәрігерлерге айттық, бірақ ешкім дұрыс қарамады. Соңы осылай аяқталды — мен өз баламнан айырылдым», — деді әйелдің күйеуі Абай Бердібек.
Туыстарының айтуынша, қайғылы жағдайдан кейін дәрігерлер не болғанын түсіндіре алмаған. Керісінше, жауапкершілікті өздерінен алыстатып, «бала толық дамымаған» деп шығуға тырысқан.
Сонымен бірге, медперсонал әйелді журналистермен сөйлеспеуге үгіттеп, палатада ұстап отырғаны айтылады.
«Палатаға кірсем, онда бас дәрігердің міндетін атқарушы, акушерлер, медбикелер, тіпті тергеуші жиналып алған. Сестрамды баланы моргқа бермеуге үгіттеп жатыр. Онда баланы жарып тастайды деп қорқытты. Меніңше, олар тексеруден қашып, істі жабуға тырысты», — дейді әйелдің ағасы Асанәлі Пірімбетов.
Қазір оқиға бойынша қылмыстық іс қозғалды. Полиция медициналық қызметкерлердің әрекетін зерттеп жатыр. Нәрестенің денесі, плацента мен кіндікбауы сараптамаға жіберілген. Мамандар сәбидің нақты неден өлгенін анықтауы тиіс. Ал қалалық денсаулық сақтау басқармасы бастапқыда жоспарлы кесар тілігін жасауды көздегенін мәлімдеді.
«Осы аптада кесар тілігін жасау жоспарланған еді — жатырішілік дамуды аяқтау үшін ұрықтың өкпесін дайындау қажет болды. Алайда плацентаның қан тамырларындағы ақаулар салдарынан оның қызметі бұзылып, 3-нен 4 желтоқсанға қараған түні ұрықтың антенатальды өлімі тіркелді», — деді басқарма өкілі Инна Глазебная.
Қайғылы оқиғадан кейін перзентханада бақылау күшейтілді. Медициналық және фармацевтикалық бақылау комитеті жағдайдың барлық мән-жайын тексеріп жатыр.
smartnews.kz
