Іс-шараны Бөген ауылдық округ әкім Әлішев Айбек ашып, қайраткердің ел дамуына қосқан зор үлесін атап өтті. Сондай-ақ ол бұл жарыстың жас ұрпақты отансүйгіштікке, еңбекқорлыққа және салауатты өмір салтын ұстануға тәрбиелеудегі маңызына тоқталып, қатысушыларға сәттілік тіледі.
Спорттық додаға ауданның түрлі елді мекендерінен жиналған 10 команда қатысты. Олардың қатарында Арал қаласы, Арал көпсалалы колледжі, Жақсықылыш кенті, Аманөткел, Жаңақұрылыс, Қамыстыбас ауылдық округтері, Қызылжар, Шөмішкөл ауылдары, сондай-ақ Бөген-1 және Бөген-2 командалары бар. Бұл жарыс ауыл жастарының спортқа деген қызығушылығын арттырып қана қоймай, өзара достық қарым-қатынасты нығайтуға да ықпал етті.
Турнир жоғары деңгейде ұйымдастырылып, тартысты әрі әсерлі өтті. Қатысушылар жақсы дайындықтарын көрсетіп, шеберлік пен ұйымшылдықтың жоғары үлгісін паш етті. Қорытындысында үздік командалар анықталып, жеңімпаздар мен жүлдегерлер арнайы марапаттарға ие болды.
Жарыс нәтижесі бойынша:
I орын – Аманөткел ауылдық округі
II орын – Жақсықылыш кенті
III орын – Қамыстыбас ауылдық округі
Сонымен қатар, турнир барысында ерекше өнер көрсеткен ойыншылар түрлі номинациялар бойынша марапатталды. «Үздік шабуылшы», «Үздік тосқауылшы», «Үздік байланыстырушы», «Үздік либеро», «Көрермен көзайымы» және «Үздік бапкер» аталымдары бойынша топ жарғандар анықталды.
Бұл спорттық шара – тек жарыс қана емес, сонымен қатар елге еңбегі сіңген тұлғаны ұлықтау, оның өнегелі өмірін жас ұрпаққа насихаттау, сондай-ақ жастарды спортқа баулу бағытындағы маңызды бастама болды.
