Іс-шараның негізгі мақсаты – тұрғындар арасында вакцинацияның маңыздылығын түсіндіру, жұқпалы аурулардың алдын алу бағытында ақпараттық-ағартушылық жұмыстарды күшейту болды
Аталған акцияға медицина қызметкерлері мен мектеп оқушылары қатысып, өзара пікір алмасу алаңы қалыптасты. Іс-шара барысында мамандар иммундау апталығының мәні мен маңызына тоқталып, вакцинацияның адам денсаулығын сақтаудағы рөлі туралы кеңінен түсіндірме жұмыстарын жүргізді. Сонымен қатар, жұқпалы аурулардың алдын алу шаралары, олардың таралу ерекшеліктері, эпидемиологиялық жағдайы және клиникалық ағымы жөнінде жан-жақты ақпарат берілді.
Медицина қызметкерлері қатысушыларға вакцинация арқылы көптеген қауіпті аурулардың алдын алуға болатынын атап өтіп, қоғамда ұжымдық иммунитет қалыптастырудың маңызын ерекше жеткізді. Оқушылар мен қатысушылар тарапынан қойылған сұрақтарға нақты әрі түсінікті жауаптар беріліп, тәжірибелік кеңестер ұсынылды.
Іс-шара соңында қатысушыларға арнайы әдістемелік ұсынымдар таратылып, денсаулықты сақтау мен нығайту бағытында жүйелі түрде профилактикалық шараларға қатысудың қажеттілігі айтылды.
Мұндай ақпараттық акциялар алдағы уақытта да жалғасын тауып, халықтың денсаулық мәдениетін арттыруға өз үлесін қоса бермек.
