Әйтеке би кентіндегі Қазалы гуманитарлық-техникалық колледжінде өткен жиынға Қазалы ауданы прокурорының міндетін атқарушы Биқожа Жұмаш, комиссия мүшелері, мектеп директорлары, колледж студенттері мен мұғалімдері қатысты.
Көшпелі комиссия отырысын жүргізіп отырған комиссия төрағасы Дәурен Тлеумбетов көшпелі комиссияның маңызы жөнінде айтып өтіп, күн тәртібіндегі мәселелерге кеңінен тоқталды.
— Бүгінгі жиынның басты мақсаты – балалардың қауіпсіздігі мен құқықтарының қорғалуы бағытындағы жұмыстардың жай-күйін жан-жақты қарастыру, қиын өмір жағдайындағы жасөспірімдерге көрсетілетін қолдаудың сапасын арттыру, сондай-ақ мектеппен, ата-аналармен және жергілікті ұйымдармен өзара іс-қимылды күшейту жолдарын анықтау. Балалар – біздің болашағымыз. Сол себепті олардың амандығы мен құқықтарының толыққанды қорғалуы – барлығымыздың ортақ міндетіміз. Өздеріңіз білесіздер, бүгінгі таңда жасөспірімдер мен жастар арасындағы құқық бұзушылық, кәмелетке толмағандарға қатысты зорлық-зомбылық, оларға қатысты кибербуллинг әрекеттері өте өзекті болып отыр. Сондықтан да жасөспірімдер арасында құқық бұзушылықтың алдын алу бағытындағы жұмыстарды күшейтіп, профилактикалық шараларды жүйелі жүргізуіміз қажет, — деді комиссия төрағасы Дәурен Оңғарбайұлы.
Басқосуда аудан прокурорының міндетін атқарушы Биқожа Жұмаш сөз сөйлеп, кәмелетке толмағандар арасындағы қылмыстың алдын алуда бірлесіп жұмыс атқарылу қажеттігін айтты. Сондай-ақ алдағы уақытта бұл бағыттағы жұмыстарды жоспарға сәйкес жүргізу керектігін жеткізді.
Комиссияда аудандық полиция бөлімінің жергілікті полиция қызметі ювеналды полиция тобының аға инспекторы Мархабат Бегалиева Қазалы ауданында кәмелетке толмағандардың арасында құқық бұзушылық профилактикасы, кәмелетке толмағандарға қарсы жасалған қылмыстар туралы, Қазалы гуманитарлық-техникалық колледжінің директоры Мұрат Таңжарықов колледжде студенттер арасындағы құқық бұзушылықтың алдын алу бағытындағы атқарылып жатқан жұмыстар және алдағы міндеттер жайындағы жұмыстарды баяндады. Сонымен қатар комиссияда аудандық полиция бөлімінің ұсынысы қаралды.
Комиссия отырысын қорытындылаған Дәурен Оңғарбайұлы отырыста қаралған әрбір мәселенің хаттамасын рәсімдеп, тиісті органдарға таратылуын тапсырады. Сондай-ақ берілген әрбір тапсырманың нәтижелі орындалуы тікелей өзінің бақылауында болатынын жеткізді.
