Baza Telegram-арнасы мәліметіне сүйенсек, марқұм Кристина – Мәскеу маңындағы Лобня қаласының тумасы. Ол 2019 жылы Ахмед есімді жігітпен танысып, бір жылдан кейін оған тұрмысқа шығып, күйеуінің туған жері – Шешенстанға қоныс аударған. Алайда қыздың туыстары мен құрбылары Ахмед үйленгісі келмегенін, бірақ әкесі – Руслан Умаевтың қысымымен ғана үйленгенін айтқан.
Кристина тұрмыста қиын өмір сүрген: күйеуі ұрып-соғып, енесі тиісіп, қызы екеуіне кейде тамақ табылмай қалатын. Бірақ қайын атасы жайлы ол ешқашан жаман сөз айтпаған.
2022 жылы Кристина ажырасуға шешім қабылдап, Мәскеу маңына қайта оралған. Алайда шешен туыстары қызымен бірге қамқорлыққа ортақ құқығын алып, ол қызы үшін жиі Шешенстанға барып жүрген. Бұл уақытта күйеуі мүлде қатыспаса да, бұрынғы қайын атасы Кристинаның жанынан табылып жүрген.
Марқұмның анасы мен құрбысы Руслан Умаевтың соңғы кездері Кристинаға оғаш, шамадан тыс көңіл бөлгенін, тіпті оған сезімін білдіріп, мәжбүрлеуге тырысқан болуы мүмкін екенін айтқан.
2024 жылдың қыркүйегінде Кристина Шешенстанда жүрген кезде байланысқа шықпай қалады. Бірнеше күннен соң анасы оның қайтыс болғанын бұқаралық ақпарат құралдарынан білген.
Руслан Умаев қылмысын мойындап, ұйықтап жатқанда келінін буындырып өлтіріп, денесін үйінің ауласында доңғалақтармен бірге өртеп, қалдықтарын өзенге тастағанын айтқан. Тергеу барысында оның үйінен қан іздері бар тұншықтырғыш жіп пен қыз жатқан диваннан шәуеттің ізі табылған.
PS. Умаев Кристинаны «аморальды әрекеті үшін» өлтіргенін айтқан. Қылмыстық іс қозғалғанымен, сот үкімі шыққан жоқ. Өйткені ол Ресей Қорғаныс министрлігімен келісімшартқа отырып, Украинадағы соғысқа аттанып кеткен. Марқұмның анасы Анастасияның айтуынша, адвокат сотқа істі тоқтату туралы өтініш жолдап, сот келісімшарттың күшіне байланысты тергеуді уақытша тоқтатқан.
Фото: instagram.com/nemolchi.uz
