Бұдабай Қабылұлы атындағы мәдениет үйінде өткен жиын «Заң және тәртіп» қағидаты аясында ұйымдастырылып, «Шиелі – қауіпсіз аудан, жарқын болашақтың мекені» және «Саналы ұрпақ» жобалары шеңберінде өткізілді. Басқосуға аудан әкімі Айтбай Жандарбеков, аудан прокуроры Мейрамбек Маханбетжанов, аудандық мәслихат төрағасы Мұрат Тұрабаев, аудандық полиция және білім бөлімдерінің басшылары, дербес бөлім жетекшілері, кент және ауылдық округ әкімдері, мектеп директорлары мен олардың орынбасарлары, сондай-ақ аудан әкімдігі жанындағы кәмелетке толмағандардың істері және олардың құқықтарын қорғау жөніндегі комиссия мүшелері мен аудан тұрғындары қатысты.
Жиын барысында қоғамдағы тәртіп пен қауіпсіздікті сақтау, жасөспірімдер арасындағы құқық бұзушылықтың алдын алу, отбасы мен білім беру ұйымдарының жауапкершілігін арттыру мәселелері кеңінен талқыланды.
Мәжілісте Мемлекет басшысы Қасым-Жомарт Тоқаев өзінің «Әділетті Қазақстанның экономикалық бағдары» атты Қазақстан халқына Жолдауында құқықтық тәртіпті нығайту, заң үстемдігін қамтамасыз ету және қоғамдағы әділеттілік қағидаттарын орнықтыру бағытында ауқымды жұмыстар жүргізіліп жатқанын атап өткендігі айтылды. Осы міндеттерге сәйкес Шиелі ауданында да қоғамдық қауіпсіздікті сақтау, құқық бұзушылықтың алдын алу және тұрғындардың құқықтық сауаттылығын арттыру бағытында кешенді шаралар қолға алынуда.
Алғаш болып сөз алған аудан прокурорының орынбасары Ғанибек Сағатов аудан көлемінде атқарылып жатқан профилактикалық жұмыстарға тоқталып, әсіресе жасөспірімдер арасындағы қылмыс пен құқықбұзушылықтың алдын алу мәселесіне ерекше назар аударды. Сонымен қатар, құқық қорғау органдары мен білім беру ұйымдары арасындағы өзара байланысты күшейту қажеттігін жеткізді.
Өз кезегінде аудандық білім бөлімінің басшысы Дауренбек Насибеков білім беру ұйымдарындағы тәрбие жұмыстары, оқушылардың құқықтық сауаттылығын арттыру, буллинг пен әлімжеттіктің алдын алу, ата-аналармен байланысты нығайту бағытында атқарылып жатқан жұмыстар жөнінде баяндама жасады. Ол мектеп пен ата-ана арасындағы ынтымақтастықты күшейту – жасөспірімдердің қауіпсіздігін қамтамасыз етудегі басты факторлардың бірі екенін атап өтті.
Сондай-ақ, аудандық полиция бөлімінің бастығының орынбасары Досым Әбуов қоғамдық тәртіпті сақтау бағытындағы жұмыстардың нәтижелерімен бөлісті. Ол аудан аумағында жүргізіліп жатқан рейдтік шаралар, түнгі уақытта кәмелетке толмағандарды бақылау, профилактикалық түсіндіру жұмыстары және құқық бұзушылықтың алдын алу бойынша қабылданып жатқан нақты шаралар туралы баяндады.
Мәжіліс барысында қатысушылар тарапынан түрлі ұсыныстар мен пікірлер айтылып, қоғамдағы қауіпсіздік пен тұрақтылықты қамтамасыз ету – баршаға ортақ міндет екені ерекше атап өтілді. Сонымен қатар, құқық қорғау органдары, білім беру мекемелері, ата-аналар және жергілікті қоғамдастық арасындағы бірлескен жұмысты күшейту қажеттігі сөз болды.
Жиын қорытындысында аудан әкімі Айтбай Жандарбеков заң мен тәртіп – қоғам тұрақтылығының басты кепілі екенін атап өтіп, жауапты сала басшыларына нақты тапсырмалар жүктеді. Сонымен бірге, қоғамдық қауіпсіздікті сақтау бағытындағы жұмыстар алдағы уақытта да жүйелі түрде жалғасатынын жеткізді.
@Шиелі ауданы әкімінің баспасөз қызметі.
