Кеңейтілген отырысқа комиссия мүшелерімен қатар, аудандық ақсақалдар кеңесінің, ардагерлер кеңесінің, қоғамдық кеңестің, аналар мен әйелдер кеңесінің өкілдері қатысты. Ашық форматта өткен басқосу еркін пікір алмасу алаңына айналып, азаматтық қоғам өкілдері өз ұсыныстары мен бастамаларын ортаға салды. Бұл, өз кезегінде, комиссия жұмысының ашықтығын арттырып қана қоймай, оның тиімділігін күшейтуге ықпал етті.
Жиын барысында аудан көлемінде отбасылық-демографиялық және гендерлік саясатты іске асыру бағытында атқарылып жатқан жұмыстар сараланып, нақты нәтижелер мен көрсеткіштерге тоқталды. Әсіресе, отбасы институтын нығайту, ана мен баланы қорғау, әйелдердің әлеуметтік-экономикалық белсенділігін арттыру секілді маңызды мәселелер кеңінен қозғалды. Сонымен қатар тұрмыстық зорлық-зомбылықтың алдын алу, оның себеп-салдарын жою, құқықтық және психологиялық көмек көрсету тетіктерін жетілдіру мәселелері де назардан тыс қалмады.
Сала мамандары атқарылған жұмыстар бойынша баяндама жасап, кездесіп отырған өзекті мәселелерді атап өтті. Олар өз сөздерінде отбасындағы тәрбиенің маңыздылығын, қоғамдағы әйелдердің белсенділігін арттыру қажеттігін, сондай-ақ әлеуметтік қолдау шараларын күшейту керектігін жеткізді. Бұдан бөлек, жастар арасында отбасылық құндылықтарды насихаттау, ерте жүктіліктің алдын алу және ажырасу деңгейін төмендету бағытындағы ұсыныстар да айтылды.
Кеңейтілген отырыс қорытындысында көтерілген мәселелер негізінде нақты шешімдер қабылданып, тиісті сала басшылары мен жауапты тұлғаларға хаттамалық тапсырмалар жүктелді. Алдағы уақытта бұл тапсырмалардың орындалуы тұрақты бақылауда болып, отбасы және гендерлік саясатты дамыту бағытындағы жұмыстар одан әрі жүйелі түрде жалғасатын болады.
