27 жастағы Мадина Халимова күйеуінің екінші әйелі бар деген қауесетке сеніп, түн ортасында кек алу мақсатымен өзенге төрт бірдей баласын лақтырып жіберген. Соңынан өзі де секірген. Алайда әйел тірі қалғанымен, балалардың ешқайсысы құтқарылған жоқ.
Қайғылы оқиға 30 маусымға қараған түні болған. Қайтыс болған балалардың үлкені – бес жастағы қыз, ал кенжесі небәрі екі айлық нәресте еді.
Елдің төтенше жағдайлар қызметі таратқан ақпаратқа сүйенсек, әйел алдымен екі баласын, артынан тағы екеуін өзенге итеріп, соңынан өзі суға секірген. Ол аман шыққанымен, төрт перзенті ажал құшты.
Жергілікті БАҚ әйелдің мұндай қадамға баруына жұбайының екінші әйел алуы себеп болғанын жазды. Көп ұзамай жұбайы Кудратулло Шарифов «екінші әйел» туралы әңгіменің жала екенін айтып, болған оқиғаны жоққа шығарды. Айтуынша, трагедия түнінде екеуінің арасында ешқандай жанжал болмаған. Таңертең оянып, әйелін де, балаларын да үйден таппаған соң, іздеуге шыққан. Сол кезде Мадина қалдырған хатты тауып алған.
Латофаттың әкесі, мені кешір. Саған жақсы жар бола алмадым, саған лайық қызмет көрсете алмадым, — делінген хатта.
Жергілікті полиция әйелдің қайда екенін анықтап, оқиға орнына жеткен кезде, ол суицидке итермелеген белгісіз екі ер адам туралы айтқан. Алайда жұбайы Мадинаның бұған дейін де психикалық ауытқу белгілері болғанын, оның ағасы өз-өзіне қол жұмсағанын жеткізді.
PS. Марқұм болған балалардың есімдері – Латофат, Зайнаб, Йосамин және Мухаммад (екі айлық). Қазір әйелге қатысты «Кісі өлтіру» бабымен қылмыстық іс қозғалып, тергеу амалдары жүргізіліп жатыр.
Фото: egemen.kz
