Одан кейін аудан басшысының төрағалығымен өткен аппарат мәжілісінде көтерілген мәселелер жан-жақты талқыланып, тиісті сала басшыларына нақты тапсырмалар берілді.
Аудан басшысы мәжілісті бастамас бұрын Қазақстан Республикасының «Сайлау туралы» Конституциялық заңына сәйкес, 2026 жылдың 12 шілдесі күні өткен Бозкөл ауылдық округі әкімінің сайлауында халықтың басым дауысына ие болып, қайта сайланған Бөлебай Ақылбек Бекқожаұлын аудан активіне таныстырды. Ауыл әкімін құттықтап, ауыл шаруашылығын дамыту, кәсіпкерлікті қолдау, жаңа жұмыс орындарын ашу, халықтың әл-ауқатын арттыру, қоғамдық-саяси тұрақтылықты сақтау, сондай-ақ «Таза Қазақстан» бағдарламасы мен «Заң мен тәртіп» қағидаты аясындағы жұмыстарды жүйелі ұйымдастыруды тапсырды.
Биылғы жылдың 6 айының қорытындысымен ауданда негізгі макроэкономикалық көрсеткіштер бойынша оң динамика қалыптасып, экономикалық өсім қамтамасыз етілді. Өнеркәсіп өнімінің көлемі – 130,2 пайызға, өңдеуші өнеркәсіп – 134,6 пайызға, бөлшек сауда айналымы – 100,3 пайызға, ауыл шаруашылығының жалпы өнімі – 105,3 пайызға, негізгі капиталға салынған инвестициялар – 104,6 пайызға, құрылыс жұмыстары – 119,2 пайызға және пайдалануға берілген тұрғын үй көлемі – 101,4 пайызды құрады.
Жиында аудан әкімі экономикалық өсім қарқынын төмендетпей, әрбір макроэкономикалық көрсеткіштің орындалуын тұрақты бақылауда ұстап, қаржының уақытылы әрі тиімді игерілуін қамтамасыз етуді тапсырды. Сонымен қатар, орындалу қаупі бар көрсеткіштерге апта сайын талдау жүргізіп, нақты шаралар қабылдау қажеттігін атап өтті.
Мәжілісте жұмыспен қамту және әлеуметтік төлемдердің орындалу барысы да жан-жақты сараланды. Жұмыспен қамтудың өңірлік жол картасы, «10 мың тұрғынға – 100 жаңа жұмыс орны» бастамасы, жастар тәжірибесі, әлеуметтік жұмыс орындары және «Күміс жас» жобасы бойынша бірқатар көрсеткіштердің төмен орындалуы сынға алынды.
Осыған байланысты аудан әкімі жауапты бөлімдер мен кент, қала және ауылдық округ әкімдеріне халықты мемлекеттік бағдарламалар туралы кеңінен ақпараттандыруды, жаңа жұмыс орындарын құруды, жоспарлы көрсеткіштердің толық орындалуын қамтамасыз етуді тапсырды. Сонымен бірге, атаулы әлеуметтік көмек көрсету және мүгедектігі бар азаматтарды оңалту бағытындағы жұмыстардың заң талаптарына сәйкес сапалы ұйымдастырылуы қажеттігін ерекше атап өтті.
Күн тәртібінде елді мекендерді абаттандыру және стихиялық қоқыс орындарын жою мәселесі де қаралды. Аудан басшысы бұған дейін берілген тапсырмалардың толық орындалмағанын айтып, анықталған кемшіліктерді қысқа мерзімде жоюды міндеттеді.
Сондай-ақ кент, қала және ауылдық округ әкімдеріне аудандық полиция бөлімімен бірлесіп, «Таза Қазақстан» бағдарламасы мен «Заң мен тәртіп» қағидаты аясында тұрғындар арасында экологиялық мәдениетті қалыптастыруға бағытталған түсіндіру жұмыстарын және рейдтік іс-шараларды тұрақты ұйымдастыру тапсырды. Абаттандыру қағидаларын бұзған азаматтарға заң талаптарына сәйкес тиісті шаралар қабылдау қажеттігін ескертті.
Мәжіліс қорытындысында аудан әкімі берілген барлық тапсырмалардың уақытылы әрі сапалы орындалуы тұрақты бақылауда болатынын айтып, жауапты басшыларға нақты міндеттер жүктеді.
