Аудан басшысы жиналған жұртшылықты айтулы мерекемен құттықтап, Рәміздердің еліміз үшін маңызына тоқталып өтті.
– Мемлекет басшысы Қасым-Жомарт Кемелұлы Тоқаев «Еліміз үшін Көк байрағымыздың, Елтаңбамыз бен Әнұранымыздың мән-маңызы айрықша. Бұл құндылықтар бейбітшіліктің, бірлік пен келісімнің, өсіп-өркендеудің белгісі» деп атап өтті. Қасиетті нышандарымызда қазақтың мың жылдық арман-тілегі, мақсат-мұраты түгел топтасқан. Көк байрағымыз – бейбіт аспан мен азаттықтың, өркениет пен тәуелсіздіктің белгісі. Елтаңбамыз – ата-бабадан қалған ұлы мұра, азаттықтың айшықты көрінісі. Ал Әнұранымыз – Отанға деген сүйіспеншілікті оятатын асқақ үн. Қазақ халқының байрағы ел бірлігін бекемдейді. Еліміздің көк Туы Біріккен Ұлттар Ұйымы секілді халықаралық ұйымдардың мінберінде желбіреп, Әнұранымыз әлем ареналарында шырқалып келеді. Бұл – барша халқымыздың бірлігі мен қажырлы еңбегінің нәтижесі. Мемлекеттік рәміздер халықтың рухы мен айбатын білдіріп қана қоймай, сол мемлекеттің әлемдік өркениет көшіндегі орны мен деңгейін де белгілейді. Сол себепті, Елтаңба мен Көк Туға, Әнұранға тағзым – тарихқа тағзым, оларға құрмет – әрбір азаматтың асыл парызы. Тәуелсіз еліміздің Рәміздері – жас ұрпақтың бойына патриоттық рухты сіңіруде, ұлттық сана мен бірегейлікті қалыптастыруда жетекші рөл атқарып келеді. Рәміздеріміз тек көркемдіктің символы ғана емес, тәуелсіз мемлекет құру идеясының жаршысы, ұлттық болмысқа деген құрмет. Мемлекеттік рәміздеріміздің беделі бүкіл әлемде өсіп, нығая берсін. Көк Туымыз көкте мәңгі желбірей берсін! – деді БЕРІК ӘБДІҒАППАРҰЛЫ.
Мерекелік іс-шара барысында Қазақстан Республикасының Рәміздері құрметтеліп, мемлекеттік қызметшілердің ант қабылдау рәсімі өткізілді. Сондай-ақ, ауданның әлеуметтік-экономикалық дамуына өз үлестерін қосып жүрген әртүрлі сала мамандары аудан әкімінің Алғыс хатымен марапатталды.
Салтанатты іс-шара аудан өнерпаздарының концерттік бағдарламасымен жалғасты. Жиын соңында Рәміздер күні мерекесіне арналған жастар арасындағы жүгіру марафоны ұйымдастырылды.
