Марқұмның туыстарының айтуынша әлімжеттік көрсеткендер бір топ болған көрінеді. Сұмдық оқиғадан соң колледжде «старшак» атанғандар Нұрдәулетті бөлмесіне апарып тастаған екен. Сорақысы бірде бір оқытушы мұның жолына тосқауыл болмаған.
Тоғызыншы сыныптан кейін Қазалыдан Қызылордаға арман қуып келген Нұрдәудет Мырзалы биыл ғана «Болашақ» жоғарғы медициналық колледжінің бірінші курс студенті атанған екен. Мереке күндері жатақханада болған оны және достарын 3-курс студенттері түнгі 12-де оятып алып, фитнес залға апарыпты. Бірнеше соққыдан соң Нұрдәудет жерге құлаған көрінеді.
— Бірінші курс студенттері былай тренажерный залда тұрады екен бір қатарда ұзыннан. Үш баланы ұрған, біздің бала 4-ші тұрған. Сөйтіп оны ұрған, жабылған, ол таэквондист ғой. Арттан құлатқан кезде тіземен отырып қалған кезде үш бала қолынан ұстап тұрған. Бір бала жүгіріп келіп мына тұстан тепкен. Сосын ол құлаған, тренажерде қаны барлығы тұр, -дейді РИММА ЕЛЕУСІЗОВА, МАРҚҰМНЫҢ ӘПКЕСІ
Жоғарғы курс студенттері не істегендерін түсінген соң Нұрдәулетке жедел жәрдем шақырудың орнына жатақханадағы бөлмесіне апарып тастамақ болған. Қансыраған денені дәлізбен апара жатқанда қыздар көріп, шу шығарған. Марқұмның жақындары осы кезде колледждегі жауаптылар қайда болған деген сұрақтан арыла алмай отыр.
– Моргке апарып тастаған, бала уже кетіп қалған. Біз осында келдік, бала жоқ! ГОВД-ға бар деді, олар моргке апарып тастадық дейді. Вахтершалар қарау керек ғой?! Енді бірдің кезінде топырлаған баланы қалай көрмейді? Мен түсінбей тұрмын. Вахтерға, басқасы вообще бақылауда болмаған бұл жерде,- дейді РУСЛАН СЕЙСЕНБАЕВ, МАРҚҰМНЫҢ ӘКЕСІ
Жеке колледждің әкімшілігі болса болған сұмдықты растады. Түнгі уақытта не себепті студенттер емін еркін жүргенін, фитнесс залы тас қараңғыда неге ашық тұрғанына тұшымды жауап бере алмады.
— Колледжде ішкілік тексеру жұмыстары жүргізіп жатыр. Сырттан да тексеру жұмыстары жүргізіліп жатыр. Сонымен қатар біраз адам жауапқа тартылып жатыр. Бұл жерде қатыстылығы қатыстылығы емес оқу ордасы болғандықтан басшылықтан бастап барлығы жауапқа тартылып жатыр,- дейді ГҮЛМИРА ӨТЕУЛИЕВА, «БОЛАШАҚ» ЖОҒАРҒЫ МЕДИЦИНАЛЛЫҚ КОЛЛЕДЖІ ДИРЕКТОРЫНЫҢ ОРЫНБАСАРЫ
Білім ордасының өкілі нақты кімге, қандай шара көрілгендігі жайлы айтпады. Қазіргі таңда полиция департаменті Нұрдаудет Мырзалының өліміне қатысты қылмыстық іс қозғады. Марқұмның туыстары не себепті күдікті ретінде бір ғана жігіт қамауға алынғандығын түсіне алмай отыр. Ұрып соғуға қатысы бар барлық жоғарғы курс студенттері жазалансын деп талап етеді.
