Төрт күнге созылатын дүбірлі додада Арал ауданы әкімдігінің командасы да бар. Аудан намысын абыроймен қорғауға бекінген жерлестеріміз спартакиаданың алғашқы күнінен-ақ жеңіске жетіп жатыр.
Айталық, гір спорты бойынша Арал ауданы командалық есепте І орынға жайғасса, жекелей сында 70 келі салмақта Сексеуіл кенті әкімі аппаратының бас маманы Б.Сәдуақасов І орын, 90 келіден жоғары салмақта Аралқұм ауылдық округінің әкімі Ж.Әбдіхалықов І орынды еншіледі. Ал 90 келіге дейінгі салмақта Арал ауданы әкімі аппаратының жұмылдыру дайындығы және аумақтық қорғаныс бөлімінің басшысы Д.Ниязымбетов пен аудандық қоғамдық даму бөлімінің бас маманы Т.Киікбаев жүлделі ІІ орынға жайғасты.
Қазақ күресі бойынша командалық есепте Арал ауданы төртінші орынға жайғасса, жекелей сында төрт азаматымыз жүлделі ІІІ орынды қанжығалады. Осылайша төрт күнге созылатын доданың алғашқы сынында аудан азаматтары жүлделі орындарға қол жеткізуде.
Айта кетейік, жарыс күнінде қатысушылармыз барлық спорт түрлерінен бақ сынасады.
Жерлестерімізге сәттілік тілейміз.
