Отан үшін жан берген бабаларымыздың ерлік істерін жалғастырушы жас ұландардың патриоттық сезімін оятатын әскери шарада, алдымен Қазақстан Республикасының Мемлекеттік Туы енгізіліп, Әнұраны орындалды.
Мұнан соң аудан әкімі Алмасбек Есмаханов жиналған қауым мен жас сарбаздарды Отан қорғашылар күнімен құттықтап, ізгі тілегін жеткізіп, айтулы мерекенің маңызына тоқталды.
Бүгінгі әскери-патриоттық шараның мәні мен маңызы ерекше. Өйткені бұл – жас ұрпақтың бойына отансүйгіштік қасиетті сіңіретін, тәртіп пен жауапкершілікті қалыптастыратын тағылымды іс-шара. Әскери шеру мен сайысқа қатысып отырған оқушылар – еліміздің ертеңі, Тәуелсіздіктің тірегі. Сіздер бүгін саптық дайындық, ептілік, тәртіп, ұйымшылдық пен батылдық арқылы өздеріңіздің намысты, жігерлі, елжанды азамат екендеріңізді көрсетіп отырсыздар. Патриотизм – тек сөзбен айтылатын ұғым емес. Ол – туған жерді құрметтеу, ел тарихын білу, мемлекеттік рәміздерді қадірлеу, ата-ананы ардақтау, қоғамға адал қызмет ету. Отанға деген сүйіспеншілік – ең алдымен туған елге пайдалы азамат болудан басталады. Бүгінгі жастар – болашақ сарбаздар, ел қорғайтын азаматтар. Сіздердің білімді, тәртіпті, рухы биік болып өсулеріңіз – мемлекетіміз үшін аса маңызды. Бүгінгі жас ұрпақты елін сүюге, Отанын құрметтеуге тәрбиелейтін маңызды шараға қатысушы барлық жас сарбаздарға сәттілік тілеймін! Айбынды әскеріміздің абыройы асқақтай берсін, — деді аудан әкімі АЛМАСБЕК ӘБІЛҚАСЫМҰЛЫ.
Аудан басшысынан кейін ауданға арнайы жұмыс сапарымен келген «AMANAT» партиясы Қызылорда облыстық филиалының төрағасы Жандос Базартай құттықтау сөз сөйлеп, жиынға қатысушылар мен жас сарбаздарды мерекемен құттықтады.
Мерекелік шара одан әрі жас ұландардың саптық шеруіне ұласты. Саптық байқауды ауданымыздағы мектептердің оқушыларынан жасақталған «Құрлық әскері», «Жас ұлан», «Әуе десанты», «Әскери теңіз күштері» сынды түрлі взводтардан құралған жас ұландар жалғастырды.
Саптық байқаудан кейін аудандық спорт мектебінің таэквондошылары қоян қолтық ұрысынан өнерлерін көрсетті. Бұдан бөлек әскери-патриоттық шарада жас ұландар «АК-74» оқу қаруын шашу секілді басқада әскери сайыс түрлері бойынша өнерлерін көрсетіп, бақтарын сынасты.
Жас ұландарға әскери рух пен жігер берген шарада патриоттық әндер айтылып, жас өрендердің отаны мен туған жеріне деген сүйіспеншілігі арта түсті.
