Алдымен білім ошақтарын аралаған аудан басшысы мектеп асханалары мен спорт залдарының жағдайын көріп, мектеп директорларына балаларға берілетін күнделікті ас мәзіріне, асхананың жалпы санитарлық жағдайына аса мән беруді тапсырды. Сонымен қатар сыныптардың керекті жабдықтармен жабдықталуы және мектептердің ішкі-сыртқы санитарлық-тазалық мәселесін назардан тыс қалдырмауды тапсырды.
Ал, аудандық оқушылар үйінің ғимаратын аралау барысында ғимараттың жай-күйін көріп, ондағы үйірме жұмыстарымен танысты. Сондай-ақ оқушылар үйінің білім алушыларымен кездесіп, балаларға жарқын болашақ тіледі. Бүгінде аудандық Оқушылар үйінде барлығы 25 үйірме бойынша 1151 оқушы білім алуда. Алдағы уақытта аудан орталығынан 200 орындық «Оқушылар үйі» мен 50 орындық «Өнер мектебін» салу жоспарланып отыр.
Айта кетейік, Әйтеке би кентіндегі Оқушылар үйі ғимараты 1905 жылы салынған Теміржолшылар клубы, кейіннен әскери шіркеу үйі болған тарихи ғимарат.
Аудан әкімі Оқушылар үйінен кейін аудан орталығындағы Қорқыт Ата атындағы аудандық балалар музыка мектебіне барды. Қорқыт Ата атындағы өнер мектебі 1964 жылдан бастап жұмыс жасап келе жатқан аудандағы бірден-бір өнер ошағы. Талай толағай таланттардың тамырына нәр берген, шәкірттерін шынайы өнердің шыңына шығарған өнегелі өнер ордасы. Бүгінде іргелі ұжымда жоғарғы дәрежелі 70-ке жуық педагог 850 оқушыға музыканың 15 бағыты бойынша дәріс береді.
