Сессияға аудан әкімі Алмасбек Есмаханов, қала, кент, ауылдық округ әкімдері, дербес бөлімдер басшылары және жеке кәсіпкерлер қатысты. Сессияға аудандық мәслихаттың төрағасы Ғазиз Әліш төрағалық етті.
Сессияның күн тәртібінде «Қазалы ауданының әлеуметтік көмек көрсетудің, оның мөлшерлерін белгілеудің және мұқтаж азаматтардың жекелеген санаттарының тізбесін айқындаудың қағидаларын бекіту туралы», «Орман қоры жерлерін елді мекен жеріне ауыстыру туралы» және «Қазалы ауданы бойынша оңайлатылған декларация негізінде арнаулы салық режимін қолдану кезінде салық мөлшерлемесінің мөлшерін төмендету туралы» сынды үш мәселе қаралды.
Сессияда аудан әкімі Алмасбек Әбілқасымұлы сөз сөйлеп, сессияда қаралған мәселелер тұрғындарға әлеуметтік көмек көрсетуге, кәсіпкерлік ахуалды жақсартуға және елді мекендердің жер көлемін кеңейтуге тікелей ықпал ететін маңызды мәселелер екенін жеткізді. Сонымен қатар сессияда қаралған аудан бойынша оңайлатылған декларация негізінде арнаулы салық режимін қолдану кезінде салық мөлшерлемесін 4 пайыздан 2 пайызға дейін төмендету туралы шешім кәсіпкерлікті дамытуға, шағын және орта бизнесті қолдауға бағытталған өте орынды әрі уақытылы шешім. Мемлекет басшысы Қасым-Жомарт Тоқаев кәсіпкерлік субъектілеріне барынша жан-жақты қолдау көрсетуді тапсырған болатын. Салық мөлшерлемесін төмендету – кәсіпкерлерге жасалған үлкен қолдау. Бұл ауданымызда шағын және орта бизнестің дамуына серпін беріп, жаңа жұмыс орындарының ашылуына, жалпы экономикалық белсенділіктің артуына ықпал етеді, — деді аудан басшысы.
Жиында жеке кәсіпкерлер атынан Алтынкүл Құрақбаева кәсіпкерлер үшін салық мөлшерлемесі 4 пайыздан 2 пайызға дейін төмендетілгені үшін алғысын жеткізіп, бұл кәсіпкерлер үшін үлкен көмек екенін жеткізді. Сессия соңында депутаттардың дауысқа салу қортындысымен тиісті шешімдер қабылданды.
