Сайлаудың қорытындысы бойынша «Аmаnаt» партиясынан ұсынылған кандидат Аман Бауыржан Толықболұлы басым дауысқа ие болып, Бірлік ауылдық округінің әкімі болып сайланды.
Бүгін аудан әкімі Алмасбек Есмаханов пен аудандық мәслихат төрағасы Ғазиз Әліш Бірлік ауылдық округінде ауыл тұрғындарымен бірге Бауыржан Аманның қызметіне сәттілік тіледі.
– Ең басты мақсат — халықтың әл-ауқатын арттыру, ауыл өмірін жақсартуға бағытталған жұмыстарды жоғары деңгейде атқару. Ауыл халқы өзіңізге үлкен сенім артып, сайлауда дауыс берді. Сондықтан округ тұрғындарымен тығыз байланыста жұмыс жасап, ауыл шаруашылығы, шағын және орта кәсіпкерлік салаларын дамытуды, елді мекендегі әлеуметтік-саяси ахуалын тұрақты ұстауды, салалық мекемелермен тікелей байланыста болып, мемлекеттік бағдарламаларда белгіленген міндеттерді жүйелі атқарып, тапсырмаларды уақытылы және сапалы орындауды тапсырамын. Жұмысыңызға табыс, қызметіңізге сәттілік тілеймін, – деді аудан басшысы АЛМАСБЕК ӘБІЛҚАСЫМҰЛЫ.
Аудан басшысынан кейін аудандық сайлау комиссиясының төрағасы Нұрлан Аманбай Бауыржан Аманға ресми түрде әкім куәлігін табыс етті.
Ауылдық ардагерлер кеңесінің төрағасы Ордабай Түлегенов сөз сөйлеп, бұған дейін елді мекенде еңбек етіп келе жатқан азаматтың алдағы қызметіне сәттілік тілесе, ауыл ақсақалдары батасын берді.
Бауыржан Толықболұлы – 1980 жылы Қазалы адуанында дүниеге келген. Білімі жоғары, Алматы қаласындағы Қазақ Ұлттық аграрлық университетін «ветеринариялық санитарлық дәрігер» мамандығы бойынша бітірген. Еңбек жолын 2004 жылы Қазақстан Республикасы Ауыл шаруашылығы министрлігі Қазалы аумақтық ветеринариялық басқармасының ветеринариялық инспекторы болып бастаған. Әр жылдары Қазалы аудандық аумақтық ветеринариялық инспекциясының жетекші маманы, бас маманы болып қызмет атқарған. 2015 жылдан бастап, «Қазалы аудандық ветеринариялық станция» коммуналдық мемлекеттік кәсіпорнының Бірлік ауылдық округі бойынша ветеринариялық пункт меңгерушісі қызметін атқарып келді.
