hronika.kz мәліметіне сүйенсек, кешке 21:10 шамасында шекара қызметінің бөлім бастығы, капитан Асу К. сарбаз Еркебұлан Сағындықты жанар-жағармай сақтайтын орынға жіберген. Ол жерден сарбаз дизель генераторының радиаторын жуу үшін бензин әкелуі тиіс болған. Алайда, әскери қызметтегі сарбаз бұл тапсырманы орындау барысында бензиннің буынан уланып, есінен танып қалған. Ал сағат 21:20-да оны электрик-дизелист тауып алған.
Бөлім бастығы, капитан Асу К. сарбазға алғашқы көмек көрсеткенімен жағдайы тым ауыр болған. Кейінірек, дәрігер-реаниматолог сарбазға қолдан келгенін жасап, аман алып қала алмағанын, оның көз жұмғанын мәлімдеген.
Ал марқұмның туыстарына Еркебұлан Сағындықтың генератор жөндеу кезінде бензин иісіне уланып көз жұмды деген хабар жеткен. Баласын бес айдан кейін үйге аман-есен оралады деп күтіп отырған бүтін бір әулет қара жамылды.
Қайғыдан қан жұтып отырған марқұмның анасы ұлының өліміне әскери қызметкерлердің қатысы бар деп күдіктенеді. Өйткені сарбаз бір апта бұрын ғана хабарласып, қиналып жүргенін айтыпты. Тіпті басқа әскери бөлімге ауыстырыңдаршы деп өтінген екен.
— Суббота күні сөйлескенде, мама басқа частьқа ауысуға мүмкіндік бар ма деді. Таныс жоқ па деді. Ойбу, жаным ненің танысы дедім. Не тыныштық па 5 ай қалғанда деп едім. Әй, ладно, Мама деді. Спортсмен здоровый бала ғой. Білмеймін мен, миым жетпейді. Бензиннен уланды дейді. Ол қалай уланады? Түсінбеймін мен, — дейді ГҮЛНАЗ ЖҰМАБАЕВА
МАРҚҰМНЫҢ АНАСЫ
20 жастағы жігіт бар сырын үйленемін деп жүрген қызына жазып отырған. Ғашығына Маңғыстаудағы әскери бөлімге келгеніне өкінетінін, мұнда сарбаздарға мүлдем жағдай жасалмағанын айтқан екен. Бойжеткеннің телефонында Еркебұлан Сағындықтың 15-20 мың теңге көлемінде жиі ақша сұраған хаттары да әлі сақтаулы. Тіпті бұзылған қозғалтқышты жөндетуге де қаражат аударғанмын дейді Ақниет Мұқан.
-Қорқытты ма білмеймін, менен сол кезде моторды істетуіміз керек деген жазбасы да бар әлі. Тез-тез ақша табылды ма, неғылды деп жаза беретін тұғын. Үстіртке қалай түсті, бұл айдаладағы жер ғой. Ақтаудың ар жағында 5-6 сағаттық жер. Магазин де жоқ. Менен 10-15 мың, бір рет 18-20 мыңдап ақша сұрайтын еді. Қиналып кеттім деп көп айтатын, — дейді АҚНИЕТ МҰҚАН
МАРҚҰМНЫҢ ДОСЫ
Ал ұлттық қауіпсіздік комитетіндегілер қылмыстық іс қозғалып, тергеу басталды қысқа ғана ақпарат таратты. Мән-жайды ашып айтпады.
-Алдын ала мәлімет бойынша, қасіреттің себебі техникалық жұмыстар кезінде қауіпсіздік шараларын сақтамауы болып табылады. Полиция органдары қылмыстық іс қозғады, қосымша қызметтік тергеу жүргізілуде,- дейді ҚР ҰҚК ШЕКАРА ҚЫЗМЕТІНІҢ БАСПАСӨЗ ҚЫЗМЕТІ
Әкесінен ерте айырылған Еркебұлан Сағындық үйдің кенжесі. Медициналық колледжде оқыған жігіт әскерден орала сала үйленуді жоспарлаған екен. Алайда арманы сол күйі орындалмады. Марқұмның туыстары тергеу әділ өтіп, кінәлілер жазасын алсын деп отыр. Айта кетейік, бұл — бір аптада шекара қызметінде болған екінші сарбаз өлімі. 5-қазанда Алматыдағы әскери бөлімде борышын өтеп жүрген 18 жастағы жауынгер де қыршыннан қиылған еді.
Айта кетейік, марқұм Еркебұлан Сағындық 2005 жылы Қызылорда қаласында дүниеге келген. 2025 жылдың көктемінде әскерге шақырылған болатын.
