Швед ақпарат құралдарының хабарлауынша, 38 жастағы Салван Момика 29 қаңтар күні кешке Стокгольм маңындағы Сёдертелье қаласында атып өлтірілген. Оның денесі көпқабатты үйдің ішінен табылған. Сондай-ақ көршілері оқ атылғанын естіген.
The Independent-тің мәліметінше, оқиға Швецияда Салван Момиканың сот отырысы өтерден бір күн бұрын болған.
Момика бірнеше рет Құранды көпшілік алдында өртеп, сол сәттің видеолары желіде қызу талқыға түсті. Оның бұл әрекеті бірқатар мұсылман елінде ерекше сынға ұшырап, олар Швеция билігін Момиканы жазалауға шақырған.
Швеция билігі сөз бостандығына сілтеме жасай отырып, оның әрекеттеріне рұқсат берді, алайда Үкімет пен қауіпсіздік қызметкерлері бұл рұқсат Швецияны ислам экстремистерінің нысанасына айналдыруы мүмкін екенін ескертті, — деп жазады басылым.
P.S.Euronews полицияға Стокгольм маңында атыс болғаны туралы хабарлама түсіп, пәтерден оқ жарақаты бар ер адам табылғанын алға тартты. Ер адамның өлімі расталған соң алдын ала тергеу басталған. Сондай-ақ атыс болған уақытта Салван Момика әлеуметтік желілерде тікелей эфирде отырған. Іс бойынша 5 күдікті ұсталған.
