Жоба шеңберінде шаштараз және тігін ісі бағыттары бойынша курстар ұйымдастырылған. Қазіргі таңда шаштараз ісі, тігін, қолөнер, жарнама ісі курстары қатысушылары өз нәтижелерімен бөлісуде. Әр қатысушыға қажетті құрал-жабдықтар мен материалдар тегін берілді. Шаштараз ісі бойынша оқып жатқан қатысушылар кәсіби құралдармен қамтамасыз етілсе, тігін ісі курсына қатысушылар өз қолдарымен оюланған шапан тігуге арналған материалдар алды.
«Бұл – өз кәсібімізді бастауға жасалған үлкен мүмкіндік», – дейді курс қатысушылары.
Айта кету керек, жоба аясындағы іс-шаралармен жалпы 50 адам қамтылған. Ал оқыту курстарына қатысу үшін қажеттілікті анықтау нәтижесінде 20 адам іріктеліп алынған. Сонымен қатар, жоба аясында заңгерлік көмек те көрсетілуде. Мысалы, жоба бенефициары, ІІ топ мүгедегі Лаззат Дәулбайқызы үш жыл бойы «шашыраңқы склероз» диагнозы бойынша тегін дәрі-дәрмек ала алмай жүрген. Жоба командасының араласуымен азаматша қажетті дәрі-дәрмектеріне қол жеткізді. Бұл – жобадағы нақты және адресті көмектің нәтижесі. Жоба аясында бүгінде мүгедектігі бар 4 әйел мен ерекше баласы бар 5 ана баспанамен қамтамасыз ету мәселесі бойынша заңгердің сүйемелдеуімен құжаттарын әзірлеуде. Олардың көпшілігіне құжат рәсімдеу, тұрғын үй кезегін жандандыру, әлеуметтік көмек алу және бейімделген тұрғын үй жобалау бойынша жан-жақты қолдау көрсетілуде.
Жоба командасы ортақ мақсат пен әлеуметтік өзгерістерге деген сеніммен жұмыс істейді. Құрамында жоба жетекшісі мен үйлестірушісі, медиа-менеджер, заңгер, психолог және оқыту курстарының тренерлері бар. Әр апта сайын жоба жетекшісі Зейнара Достанқызы Тәжиеваның бастамасымен кездесу өткізіліп, атқарылған жұмыстар мен табысты кейстер талқыланады және алдағы жоспарлар айқындалады. Жоба аясында тек тұрғын үй мәселесі ғана емес, құқықтық, психологиялық және кәсіби қолдау шаралары да кешенді түрде жүргізілуде.
«Біз әрбір әйелдің өз үйінде қауіпсіз, лайықты өмір сүруіне мүмкіндік беруіміз керек. Бұл – қоғамның адамгершілік деңгейінің көрсеткіші», – дейді жоба жетекшісі ЗЕЙНАРА ТӘЖИЕВА.
Жобаны «Ақ босаға» қоғамдық бірлестігі ұйымдастырып отыр. Бағдарлама «Omirlik Maqsat» жобасы аясында Орталық Азияның Еуразия Қоры (ФЕЦА) және Citi қорының қолдауымен жүзеге асырылуда.
Жобаның мақсаты — мүгедек әйелдер мен ерекше баласы бар аналардың өмір сүру сапасын арттыру, олардың тұрғын үйге, білімге және әлеуметтік ресурстарға тең қолжетімділігін қамтамасыз ету.
