Бостандыққа шыққандардың бірі – алаяқтық бабымен 1 жылға бас бостандығынан айырылған ер адам. Ол жазасын қауіпсіздігі барынша төмен мекемеде өтеген болатын.
Қызылорда қалалық №2 сотының қаулысымен оның қалған 5 ай мерзімі рақымшылыққа сәйкес қылмыстық жауаптылықтан босатылды.
– Жасаған қылмысыма өкінемін. Рақымшылық заңы бойынша бостандыққа шықтым – бұл мен үшін үлкен өмірлік сабақ болды. Ендігі мақсатым – отбасыммен қауышып, заң талаптарын бұзбай, жұмысқа орналасып, балаларымды дұрыс тәрбиелеуге бар күшімді салу, – деді босатылған азамат.
№37 мекеме бастығының орынбасары Нұрлан Мұхтаровтың айтуынша, аталған рақымшылық заңы мекемеде жазасын өтеп жатқан 79 сотталған тұлғаға қолданылады. Оның ішінде жетеуі толық босатылуға, қалғандарына жаза мерзімін қысқартуға жатады.
– Бүгінгі күні үшеуі бостандыққа шықты. Қалған сотталғандардың құжаттары сотта қаралуда. Рақымшылық заңы аясындағы жұмыстар заң талаптарына сай әрі жүйелі түрде жүргізілуде, – деді мекеме бастығының орынбасары.
Айта кетейік, рақымшылық заңы Қызылорда облысы бойынша ҚАЖ мекемелерінде жазасын өтеп жатқан 200-ден аса сотталғанға қолданылады.
