«Postscript.kz» ақпараттық агенттігіне сотталушының жақындары да, сүйіп қосылған келіншегі де аса ауыр жазамен келіспейтінін айтып шағымданды.
Шиелі ауданында тұратын Нұртілеу мен Аяла былтыр наурыз айында шаңырақ көтерген. Сол кезде жігіттің жасы 21-де, ал қыз 15 жаста болыпты. Қос ғашық отбасылық жауапкершілікті арқалай алатындарын айтып екі жақтың үлкендерінен рұқсат сұрайды. Ешкім қарсы болмаған соң, имамға неке қидырады. Артынша ағайынды шақырып, дүркіретіп той жасаған.
Біраз уақыт өткен соң Аяла жүкті болған. Аяғы ауыр келінін дәрігерге тексеруге апарғаннан кейін, құзырлы орган өкілдері жас отбасының тағдырына араласты дейді жігіттің анасы.
“Бала түсіп қалатын қауіпі бар деген соң, емханаға тексерттік. Ал дәрігерлер аяғы ауыр 15 жастағы келінім туралы ақпаратты полицейлерге жеткізіпті. Бір аптадан кейін баламды құзырлы органға шақырды. Содан тергеу басталды. 3 ай баламды тергеп сандалтты. Қазір қаншама қыз 16 жасқа толмай үйленіп жатыр. Олардың күйеуін неге соттамайды? Оларға заң жоқ та, бізге келген бар ма? Менің баламды апарды да, педофил деп 12 жылға соттап жіберді. Әділдік қайда?”, — деп жыларман сотталушының анасы Гүлбану Әшірбаева.
Осылайша бақытты өмірді аңсаған қос ғашықтың өмірі астаң-кестең болған. Яғни Нұртілеу Ибрагимов ҚК-нің 122-бабы, 3-бөілігі, 1-тармағы бойынша “16 жасқа толмаған қызды төсек қатынасына тартты” деген айыппен 12 жылға түрмеге қамалды. Сотта келіншегі жәбірленуші ретінде танылған екен.
Бірақ Аяла әлі күнге күйеуінің үйінде, келіндік міндетін атқарып жүр. Ол “өз еркіммен үйлендім” деген сөзімді судья да, құзырлы орган өкілдері де елемеді деп күйінеді.
“Мен бұл үкімге келіспеймін, күйеуімді босатып беріңдер дедім. Мысалы былай қарап отырсақ, 15 жастан үйленіп жатқандар көп қой. Бірақ солар бақытты болуға лайық та, біз неге бақытты болуға лайық емеспіз. Не үшін менің күйеуім жазықсыздан жазықсыз түрмеде отыр?”- дейді сотталушының жары Аяла Жүрсін.
Сот бұған байланысты пікір білдірмейміз дейді. Өйткені іс жабық қаралған екен. Ең қиыны, өткен аптада аппеллияциялық сотта да Нұртілеудің жақындарының шағымы қанағаттандырусыз қалған.
P/S: Екі жастың өміріне алаңдаған ата-аналар әділдікке қол жеткізу үшін енді жоғары сотқа шағымданамыз дейді.
