Қызылордада ерікті жастар мен пробация есебіндегілер сенбілікке қатысты

Қызылорда қаласында «Қызылорда облыстық Жастар ресурстық орталығы» КММ-нің ерікті жастары мен қалалық пробация қызметінің есебінде тұрған азаматтар бірлесіп сенбілік ұйымдастырды. Игі шара барысында қатысушылар қала аумағындағы қоқыстарды жинап, көшелер мен бөлінген аумақтарды тазартты. Мұндай акциялар экологиялық мәдениетті қалыптастыруға, қоршаған ортаны таза ұстауға және қаланың санитарлық жағдайын жақсартуға ықпал етпек. Қызылорда қалалық пробация қызметі бастығының орынбасары Гүлнұр Байсариева бұл бастаманың маңыздылығын атап өтті: – Осындай қоғамдық жұмыстарға бас бостандығы шектелген азаматтар да тұрақты түрде қатысып, игілікті іске үлес қосып келеді. Бұл олардың қоғамға бейімделуіне әрі өз орнын табуына үлкен септігін тигізеді, – деді ол. Сенбілікке қатысқан азаматтардың бірі де өзінің ойымен бөлісті: – Қаланың тазалығына үлес қосқаныма қуаныштымын. Әрине, жастық шақта жасаған қателігім үшін өкінемін. Ендігі мақсатым – заң бұзушылыққа жол бермей, қоғамға пайдалы азамат атану. Осы жолда қолдау көрсеткен пробация қызметінің мамандарына алғысым шексіз, – деді ол.