Семинарға Қызылорда облыстық АИТВ/ЖИТС орталығының мамандары — Ұйымдастыру бөлімінің меңгерушісі Утепова Жамиля Дүйсенбаева, Эпидемиология бөлімінің меңгерушісі Балықбаева Салтанат Шамиевна және емдеу бөлімінің меңгерушісі Мусрепова Лаура қатысып, тақырып аясында кең көлемде түсіндірме жұмыстарын жүргізді.
Семинар барысында АИТВ-инфекциясының таралу жолдары, алдын алу шаралары, инфекцияны ерте анықтау, диагностика және заманауи емдеу тәсілдері жөнінде жан-жақты ақпарат берілді. Сонымен қатар медицина қызметкерлеріне инфекциялық бақылау талаптарын сақтау, медициналық құралдарды залалсыздандыру, науқастармен жұмыс жасау кезіндегі қауіпсіздік ережелері және кәсіби жұқтырудың алдын алу мәселелері түсіндірілді.
АИТВ-инфекциясы – адамның иммун тапшылығы вирусын (АИТВ) жұқтыру нәтижесінде пайда болатын баяу үдемелі жұқпалы ауру. Бұл вирус адамның иммундық жүйесін зақымдап, ағзаның қорғаныш қабілетін әлсіретеді. Соның салдарынан адам ағзасы түрлі инфекциялық ауруларға және қатерлі ісіктерге қарсы тұра алмай қалады. Атап айтқанда, бактериялық пневмония, кандидоз, герпес, адам папилломавирусы секілді оппортунистік инфекциялар жиі кездеседі.
ЖИТС (жүре пайда болған иммун тапшылығы синдромы) – АИТВ-инфекциясының соңғы сатысы болып табылады. Бұл кезеңде иммундық жүйе толықтай әлсіреп, науқастың өміріне үлкен қауіп төндіреді.
Инфекция көзі – вирус жұқтырған адам, вирус тасымалдаушы немесе ЖИТС-пен ауыратын науқас. Көп жағдайда вирус тасымалдаушылар өздерінің жұқтырғанын білмейді, себебі ауру белгілері бірнеше жыл бойы байқалмауы мүмкін. Осы уақыт аралығында олар басқа адамдарға инфекция жұқтыру қаупін тудырады.
