Тазалық шарасы «Арман» мәдениет үйі алаңында басталып, экологиялық акцияға аудан әкімі Айтбай Жандарбеков арнайы қатысты. Аудан басшысы қоршаған ортаның тазалығы — баршаға ортақ міндет екенін атап өтіп, ауданның көркеюі мен тазалығына тұрақты түрде үлес қосып жүрген белсенді азаматтар мен мекеме қызметкерлерін марапаттады.
– “Тазалық жұмыстары — қоршаған ортаны күтіп ұстау ғана емес, елге, жерге деген жанашырлықтың айқын көрінісі. Таза әрі көрікті аудан қалыптастыру — барлығымыздың ортақ міндетіміз. Әр тұрғын туған жерінің тазалығына жауапкершілікпен қарап, ортақ іске өз үлесін қосуы қажет,” – деді аудан әкімі.
Сенбілікке «Қазатомөнеркәсіп» ҰАК қарасты «РУ-6» ЖШС, «Волковгеология» АҚ-ның №23 геологиялық барлау экспедициясы, «Семізбай-U» ЖШС-нің Иіркөл филиалы, «Уранэнерго» ЖШС, «KAP Logistics» ЖШС-нің «Шиелі-Сұңқар» филиалы, «Волковгеология» АҚ-ның «Геотехноцентр» филиалы және «Гежуба Шиелі Цемент Компаниясы» ЖШС, «КНК Кемикал» ЖШС ұжымдары белсенді қатысты.
Экологиялық акция барысында көпқабатты тұрғын үйлердің аулалары мен қоғамдық орындарда санитарлық тазалық жұмыстары жүргізіліп, қоқыс қалдықтары шығарылды, ағаштардың түптері әктеліп, қоршаулар мен балалар ойын алаңдары әрленіп-сырланды. Сонымен қатар аумақтар арамшөптерден тазартылып, көгалдандыру жұмыстары қолға алынды.
Жалпы тазалық жұмыстарына 2600 адам қатысып, 20 арнайы техникалар жұмылдырылды. Нәтижесінде аудан аумағынан 41 тоннаға жуық тұрмыстық және қатты қалдықтар шығарылды.
Мұндай экологиялық шаралар ауданның санитарлық жағдайын жақсартумен қатар тұрғындардың қоршаған ортаға деген жауапкершілігін арттыруға, туған жерге деген жанашырлық мәдениетін қалыптастыруға бағытталған.
@Шиелі ауданы әкімінің баспасөз қызметі.
