Шара барысында аудан әкімі тұрғындарды ортақ іске жұмыла қатысуға үндеп, тазалық пен қоршаған ортаны қорғау – баршаға ортақ міндет екенін атап өтті.
– Мемлекет басшысы Қасым-Жомарт Тоқаев «Тазалық – өркениетті қоғамның айнасы, дамуға ұмтылған кез келген елдің мызғымас ұстанымы» деген болатын. Аймағымызда орталық алаңдар мен мәдени-демалыс орындарын қайта жаңғырту жұмыстары қарқынды жүргізілуде. Осыған байланысты өңірімізде дизайн-код бекітіліп, облыс орталығынан бастап барлық елді мекендер бірегей сәулеттік талаптарға сай жаңаруда. Ауданымызда жаңа демалыс орындары мен аллеялар салынып, көшелерге абаттандыру және жарықтандыру жұмыстары жүргізілуде. Қоршаған ортаны қорғау бағытында тұрмыстық қатты қалдықтарды тиімді басқару, сұрыптау және өңдеу жұмыстары жүйеленіп келеді. Аудан орталығында қатты тұрмыстық қалдықтар полигоны жұмыс жасауда. Аймақ басшысының қолдауымен соңғы үш жылда «Үлгілі елді мекен» конкурсы аясында ауданымыздағы үздік ауылдық округтерге 7 арнайы техника табысталды. Барлық мемлекеттік мекемелер, кәсіпорын ұжымдары мен ерікті тұрғындар тазалық жұмыстарына белсенді атсалысып келеді. Өткен жылы ауданымызда жасыл белдеуге, кіреберіс жолдар мен ірі көшелер бойына 17 мыңнан астам ағаш егілсе, биыл жыл басынан бері 11 мыңнан аса тал көшеті отырғызылды. Президент бастамасын қолдап, бірліктің туын жоғары ұстап, туған жеріміздің келбетін бірге көркейтейік, – деді БЕРІК ӘБДІҒАППАРҰЛЫ.
Жиын барысында ауданның қоғамдық жұмыстарына белсенді қатысып жүрген бірқатар азаматтарға аудан әкімінің Алғыс хаты табысталды.
Сонымен қатар, аудандық ардагерлер кеңесінің төрағасы Мұса Келдібаев сөз сөйлеп, тазалық жұмыстарының қоғам үшін маңыздылығына тоқталды. Ол ел бірлігі мен туған жерге жанашырлық таныту – әр азаматтың парызы екенін айтып, аудан тұрғындарын қоршаған ортаны таза ұстауға шақырды.
