Акцияның басты мақсаты – қоршаған ортаны қорғау, елді мекендердің тазалығын сақтау, көгалдандыру жұмыстарын күшейту және тұрғындардың экологиялық жауапкершілігін арттыру. Бұл бағытта ұйымдастырылған шара аудан көлемінде кең қолдау тауып, түрлі сала өкілдерін ортақ іске жұмылдырды.
Шараға Жалағаш ауданының әкімі Ардақ Ибраимов арнайы қатысып, экологиялық бастамалардың маңыздылығына тоқталды. Ол өз сөзінде табиғатты қорғау – тек мемлекеттік мекемелердің ғана емес, әрбір азаматтың ортақ міндеті екенін атап өтті.
«Бүгінгі тал егу акциясы – болашаққа жасалған игі қадам. Әр отырғызылған тал – ертеңгі ұрпаққа қалдырылған аманат. Табиғатқа жанашырлықпен қарап, қоршаған ортаны таза ұстау – біздің азаматтық парызымыз. Барша тұрғындарды осындай игі бастамаларға белсенді түрде қатысуға шақырамын», – деді аудан әкімі.
Ауқымды экологиялық шараға зиялы қауым өкілдері, еңбек ардагерлері, ауданның ақсақалдары, түрлі этнос өкілдері, аналар және әйелдер кеңесінің мүшелері, мемлекеттік мекеме қызметкерлері, жастар ұйымдары мен еріктілер, сондай-ақ аудан тұрғындары белсенді түрде қатысты. Қатысушылар бірлесе отырып, белгіленген аумақтарға 550 түп ағаш отырғызды. Бұл жұмыстар ауданның экологиялық жағдайын жақсартуға және жасыл желек қорын арттыруға айтарлықтай үлес қосты.
Сонымен қатар, акция барысында елді мекендерді абаттандыру, көшелер мен қоғамдық орындарды тазарту, көгалдандыру жұмыстарын жүйелі түрде жүргізу мәселелері кеңінен насихатталды. Ұйымдастырушылар сенбіліктерді тұрақты түрде өткізіп тұрудың маңыздылығына ерекше назар аударып, тазалықты сақтау әрбір тұрғынның күнделікті әдетіне айналуы тиіс екенін жеткізді.
Шараға қатысушылар экологиялық мәдениетті қалыптастыру жолында бірлесе әрекет етуге дайын екендіктерін білдіріп, мұндай бастамалардың алдағы уақытта да жалғасын табатынына сенім білдірді. «Таза өлке – Жалағаш» акциясы аудан тұрғындарының табиғатқа деген жауапкершілігін арттырып қана қоймай, қоғамда экологиялық сана қалыптастыруға бағытталған маңызды қадамдардың бірі ретінде бағаланды.
