2025 жылғы 22 тамызда ҚР Бас мемлекеттік санитариялық дәрігерінің «Тұмау, жіті респираторлық вирустық инфекциялар және коронавирус инфекциясы бойынша 2025-2026 жылдардың эпидемиялық маусымында санитариялық-эпидемияға қарсы, санитариялық- профилактикалық іс-шаралар жүргізу туралы» Қаулысы шықты.
Қаулыға сәйкес ағымдағы жылдың 1 қазанынан бастап медициналық ұйымдардың медицина қызметкерлеріне маска кию режимі енгізілді, медициналық ұйымдарда дезинфекциялық режим, ұйымдасқан ұжымдарда профилактикалық шаралар мен жылу ережелерінің сақталуын мониторингілеу күшейтілді.
Дүниежүзілік денсаулық сақтау ұйымы халықты тұмаудан қорғаудың жалғыз және тиімді әдісі ретінде тұмауға қарсы вакцинациялауды ұсынады. Осы мақсатта биыл облыстық бюджеттен тұмауға қарсы Ресей елінде өндірілген «Гриппол плюс» вакцинасының 85 006 дозасы сатып алынды. Ол эпидмаусымда айналымда болатын тұмау вирусының А (H1N1 и H3N2) және В типтеріне қарсы тиімді қорғаныс қалыптастыра алады. Бүгінгі күні 17 862 адам тұмауға қарсы екпе алды. Иммундау жұмыстары жалғасуда.
ҚР Үкіметінің 2020 жылғы 24 қыркүйектегі №612 қаулысымен бекітілген медициналық көмектің кепілдік берілген көлемі шеңберінде міндетті профилактикалық екпелерді жүргізу қағидаларына сәйкес жыл сайын тұмауға қарсы вакцинациялау тиісті контингенттерге тұрғылықты мекен-жайы бойынша емханаларда тегін жүргізіледі. Олар – қауіпті топқа жататын медицина қызметкерлері, медициналық ұйымда диспансерлік есепте тұрған науқастар, жүкті әйелдер және балалар үйінің, сәбилер үйінің балалары, қарттар үйінің контингенті. Сондай-ақ, эпидемиологиялық көрсетілімдер бойынша жүргізіледі. Осы аталған контингентте қамтылмаған адамдар екпені ақылы түрде салдыруына болады.
Қызылорда облысының санитариялық-эпидемиологиялық бақылау департаменті ЖРВИ және тұмаудан сақтану үшін вакцина алуға, жеке бас гигиенасын орындауға кеңес береді. Сондай-ақ, эпидмаусым кезінде көпшілік орындарда, нашар желдетілетін жерлерде және аталған инфекциялардың клиникалық белгілері бар адамдармен араласқанда бетперде киіп, арақашықтықты сақтау, қолды жиі сабындап жуып, антисептиктерді пайдалану да маңызды. Бұл сақтық шаралары тек тұмау мен ЖРВИ-дан ғана емес, өзге де инфекциялық ауруларды жұқтырып алу қаупін төмендетеді.
Әлия Әбдіқайымова
Қызылорда облысының СЭБД басшы орынбасары
