Жиында аудан әкімі аталған ұлттық жобаның іске асырылу мәселесі Үкімет отырысында талқыланғанын атап өтіп, облыс әкімі тарапынан осы бағытта нақты тапсырмалар берілгеніне тоқталды.
– Өздеріңізге белгілі, соңғы жылдары Ақсу, Қаракеткен, Мырзабай ахун, Мақпалкөл және Аламесек ауылдық округтерінде электр желілерін қайта жаңғырту жұмыстары жүргізіліп, пайдалануға берілді. Нәтижесінде 127,3 шақырым электр желісі жаңғыртылып, 35 қосалқы станса салынды. Ендігі кезекте Жалағаш кентінің теміржолдың арғы беті бөлігін және М.Шәменов, Еңбек ауылдық округтерінің инженерлік-коммуникациялық инфрақұрылымын жаңғырту жұмыстарын жүзеге асыру қажет, – деді аудан әкімі.
Қазіргі таңда Жалағаш ауданындағы электр желілерінің жалпы ұзындығы 457,51 шақырымды құрайды. Оның ішінде 259,68 шақырымы – 0,4 кВ, ал 197,83 шақырымы – 10 кВ электр желілеріне тиесілі.
Аудандағы 14 елді мекеннің электр желілерін реконструкциялау жұмыстары толық аяқталған. Ал тағы 3 елді мекен бойынша жобалық-сметалық құжаттамалар әзірленіп, тиісті бюджеттік өтінім салалық басқармаға ұсынылған.
Электр желілерін жаңғырту – елді мекендердегі инфрақұрылымның тұрақты жұмысын қамтамасыз етудің маңызды бағыттарының бірі. Жаңартылған желілер электр қуатының сапасы мен сенімділігін арттырып, тұрғындарға көрсетілетін коммуналдық қызметтердің тұрақтылығын қамтамасыз етуге мүмкіндік береді.
Мәжілісте бұдан бөлек, өрт қауіпсіздігінің алдын алу шаралары және алдағы күзгі-қысқы маусымда коммуналдық қызметтердің үздіксіз жұмысын қамтамасыз ету мәселелері қаралды.
Аудан әкімі жауапты сала басшыларына алдағы кезеңдегі жұмыстарды сапалы әрі уақтылы ұйымдастыруды тапсырды. Күн тәртібіндегі мәселелер бойынша жауапты бөлімдер мен мекеме басшыларына, кент және ауылдық округ әкімдеріне нақты хаттамалық тапсырмалар берілді.
