Мәжілісте аудан әкімі күн тәртібіндегі мәселелердің маңыздылығына тоқталып, жауапты сала басшыларына нақты міндеттер жүктеді.
«Бүгінгі Үкімет отырысында қаралған мәселелер бойынша аймақ басшысы тарапынан нақты тапсырмалар берілді. Барлық тапсырмалар сапалы әрі уақытылы орындалуы тиіс. Жазғы демалыс кезеңінде барлық үйірмелер мен спорттық секциялардың тұрақты жұмысын қамтамасыз етіңіздер. Балалардың қауіпсіздігіне ерекше мән беріліп, лагерьлердегі санитарлық талаптар мен қауіпсіздік шаралары толық сақталуы қажет. Сонымен қатар, мемлекеттік бағдарламалардың ауданда орындалу барысын тұрақты бақылауда ұстап, межеленген көрсеткіштердің сапалы орындалуын қамтамасыз ету тапсырылады», – деді А.Ибраимов.
Биыл ауданда 470 оқушы мектеп бітірді. Оның 414-і Ұлттық бірыңғай тестілеуге қатысуға өтініш берген. Түлектердің 20-сы «Алтын белгіге» үміткер болса, 42 бітіруші «Үздік аттестатқа» ұсынылған.
Сонымен қатар, биылғы оқу жылында республикалық ауыл мектептеріне арналған олимпиаданың облыстық кезеңіне 106 оқушы қатысып, оның 22-сі республикалық кезеңге жолдама алды. Нәтижесінде республикада 8 оқушы жүлделі орын иеленіп, оның ішінде 3 оқушы Алтын медаль иегері атанса, 2 оқушы Күміс медаль, 3 оқушы Қола медаль жеңіп алды.
Балалардың жазғы демалысын тиімді ұйымдастыру мақсатында биыл «Ақтерек» лагерінде 452 баланың демалысы жоспарланған. Оның ішінде 402 бала – міндетті оқу қоры есебінен, 50 бала – кәсіподақ есебінен қамтылады.
Аудан әкімі балалардың жазғы демалысын сапалы әрі мазмұнды ұйымдастыру және қауіпсіздігін қамтамасыз ету бойынша жауапты сала басшыларына нақты тапсырмалар жүктеді.
Жиын қорытындысымен күн тәртібінде қаралған мәселелер бойынша кент және ауылдық округ әкімдеріне, тиісті бөлім және мекеме басшыларына хаттамалық тапсырмалар берілді.
