Ұйымдастырушылардың айтуынша, акция аясында көпқабатты тұрғын үйлердің аулалары тазартылып, аумақтарды абаттандыру және көркейту жұмыстары жүргізіледі. Сонымен қатар, ортақ пайдаланылатын жерлердегі қоқыстар шығарылып, тұрғындардың өз аулаларына деген ұқыптылығы мен жанашырлығын арттыру көзделген.
Мұндай бастамалар ауданның санитарлық жағдайын жақсартып қана қоймай, қоғамда экологиялық мәдениетті қалыптастыруға да оң әсер етеді. Әсіресе жастар мен еріктілердің белсенділігі бұл бағыттағы жұмыстардың нәтижелі болуына ықпал етпек.
Осыған орай ұйымдастырушылар аудан тұрғындарын, жастарды, еріктілерді және пәтер иелерін ортақ іске белсене қатысуға шақырады. Әрбір тұрғын өз ауласын таза ұстап, қоршаған ортаны қорғауға үлес қосса, ауданның көркі арта түсетіні сөзсіз.
Іс-шара 18 сәуір күні сағат 09:00-де Жаңақорған кентіндегі «Саяжай» мөлтек ауданында, көпқабатты тұрғын үйлер аумағында өтеді.
Айта кетейік, «Таза аула – таза қоғамның бастауы» қағидатын ұстанған бұл акция өңірдегі тазалық мәдениетін арттыруға және тұрғындардың белсенді азаматтық ұстанымын қалыптастыруға бағытталған.
