Қазіргі таңда аудан көлемінде спорт инфрақұрылымын дамытуға ерекше көңіл бөлініп келеді. Соның нәтижесінде елді мекендерде жаңа спорт алаңдары мен кешендер салынып, жастардың спортпен тұрақты айналысуына мүмкіндік жасалуда. Жөлек ауылында бой көтеріп жатқан бұл заманауи спорт кешені де – сол жүйелі жұмыстардың нақты көрінісі.
Жаңа нысанның жалпы ауданы 982,15 шаршы метрді құрайды. Ал ғимараттың құрылыс алаңы 885,40 шаршы метр болса, жалпы құрылыс көлемі 9 990 текше метрге жетеді. Спорт кешені заманауи сәулеттік талаптарға сай жобаланып, өлшемі 20х42 метр болатын тіктөртбұрыш пішінінде салынуда. Жоба ауыл тұрғындарының қажеттілігі мен спорттық талаптарды ескере отырып әзірленген.
Құрылыс жұмыстарын мердігер мекеме – «Интегрострой» ЖШС жүзеге асыруда. Сонымен қатар, нысанның сапалы әрі талапқа сай салынуын бақылау мақсатында техникалық қадағалауды «Строительный контроль» ЖШС жүргізсе, авторлық қадағалау қызметін «ПСК Qabylet» ЖШС атқаруда.
Аталған спорт кешені пайдалануға берілгеннен кейін ауыл жастарының спортпен тұрақты шұғылдануына мол мүмкіндік тумақ. Мұнда түрлі спорттық үйірмелер мен жаттығу сабақтарын өткізуге жағдай жасалып, жасөспірімдердің бос уақытын тиімді ұйымдастыруға ықпал етеді деп күтілуде. Сонымен қатар, ауыл тұрғындары арасында бұқаралық спортты дамытуға және салауатты өмір салтын насихаттауға да серпін бермек.
Мамандардың айтуынша, мұндай әлеуметтік маңызы бар нысандардың салынуы ауылдық елді мекендердегі спорт инфрақұрылымын жақсартып қана қоймай, өскелең ұрпақтың дене тәрбиесіне деген қызығушылығын арттыруға оң әсер етеді. Бұл өз кезегінде жастардың белсенді өмір салтын қалыптастырып, болашақта түрлі спорттық жетістіктерге жетуіне негіз болмақ.
