Аталған қосалқы станция 1964 жылдан бері үздіксіз жұмыс істеп келеді. Алпыс жылдан астам уақыт ішінде аудан халқы мен өндіріс орындарын тұрақты электр қуатымен қамтамасыз етуде маңызды стратегиялық нысанға айналған станция бүгінде де өңірдің энергетикалық жүйесінде ерекше рөл атқарады.
Қазіргі таңда Шиелі ауданы бойынша 19 мыңнан астам электр энергиясын тұтынушы тіркелген. Оның ішінде 17 мыңнан астамы жеке тұлғалар болса, 1900-ден астамы заңды тұлғалар қатарында. Халық санының артуы мен өндірістік нысандардың көбеюі электр қуатына деген сұранысты жылдан-жылға ұлғайтып отыр. Осыған байланысты қосалқы станцияны жаңғырту жұмыстары уақыт талабынан туындаған маңызды қадам болды.
Жаңғырту барысында тозығы жеткен құрал-жабдықтар жаңартылып, заманауи технологиялар енгізілді. Бұл өз кезегінде электр желілерінің сенімділігін арттырып, апаттық жағдайлардың алдын алуға мүмкіндік береді. Сонымен қатар жаңа жүйелер энергияны тиімді таратуға жағдай жасап, аудан тұрғындарын сапалы әрі тұрақты электр қуатымен қамтамасыз етуге ықпал етеді.
Мамандардың айтуынша, жаңартылған қосалқы станцияның қуат мүмкіндігі артып, электр желілеріндегі жүктемені азайтуға оң әсерін тигізеді. Әсіресе жаз және қыс мезгілдеріндегі электр энергиясына түсетін жоғары жүктеме кезінде жүйенің тұрақты жұмыс істеуіне жол ашады.
Бүгінде аудан көлемінде инженерлік инфрақұрылымды жаңғыртуға бағытталған жұмыстар кезең-кезеңімен жалғасуда. Бұл бастамалар өңірдің әлеуметтік-экономикалық дамуына серпін беріп, тұрғындардың өмір сүру сапасын арттыруға бағытталған маңызды жобалардың бірі ретінде бағалануда.
