Қазіргі таңда нысанды толық жаңғыртуға бағытталған құрылыс-монтаж жұмыстары кезең-кезеңімен жүзеге асырылуда. Жоба аясында спорт кешені заманауи талаптарға сай қайта бейімделіп, тұрғындардың спортпен тұрақты айналысуына барлық мүмкіндік қарастырылмақ.
Жөндеу жұмыстары барысында ғимараттың ішкі және сыртқы бөліктері толық жаңартылып, инженерлік инфрақұрылым жүйелері ретке келтіріледі. Сонымен қатар, спорт залдарына заманауи талаптарға сәйкес әрлеу жұмыстары жүргізіліп, келушілер үшін қолайлы әрі қауіпсіз орта қалыптастыру көзделген.
Аталған спорт кешенінің жалпы ауданы 1 816 шаршы метрді құраса, құрылыс алаңы 1 878 шаршы метрге тең. Ал нысанның жалпы құрылыс көлемі 13 152 текше метрді құрайды. Бұл өз кезегінде аудан тұрғындарының түрлі спорт түрлерімен айналысуына кең мүмкіндік береді.
Мамандардың айтуынша, жөндеу жұмыстары аяқталғаннан кейін спорт кешені тұрғындардың игілігіне беріліп, әсіресе жастардың спортқа қызығушылығын арттыруға оң ықпал етеді. Сондай-ақ, нысан бұқаралық спортты дамытуға, аудан көлемінде түрлі жарыстар мен спорттық іс-шараларды өткізуге қолайлы орталықтардың біріне айналмақ.
Бүгінде елімізде дене шынықтыру мен спорт саласына ерекше көңіл бөлініп келеді. Осы бағыттағы жұмыстар Шиелі ауданында да қарқын алып, халықтың денсаулығын нығайтуға және жас ұрпақтың белсенді өмір салтын қалыптастыруға негіз болуда.
