Қазіргі таңда Шиелі кентінде 36 мыңнан астам халық тұрады. Елді мекен тұрғындарын аяқ сумен қамтамасыз етуде «Сырдария» өзенінен бастау алатын «Базар» арығының маңызы ерекше. Су арнасы арқылы кент аумағындағы тұрғын үйлер мен бау-бақша алқаптарына су жеткізіліп келеді.
Мамандардың айтуынша, ашық арықтар арқылы ағатын судың белгілі бір бөлігі жол-жөнекей жерге сіңіп, ысырап болатын жағдайлар жиі кездеседі. Осыған байланысты су шығынын азайту және жүйенің сапасын жақсарту мақсатында арыққа темір-бетонды лотоктар орнату қажеттілігі туындаған.
Аталған жоба бойынша 2023 жылы тиісті сараптаманың оң қорытындысы алынған. Жобаға сәйкес «Базар» арығының жалпы ұзындығы 8 400 метрді құрайды. Оның 2 886 метр бөлігіне 2016 жылы темір-бетонды науа орнатылған болса, қалған 5 514 метр аумаққа лотоктар салу жұмыстары кезең-кезеңімен жүзеге асырылмақ.
Құрылыс жұмыстары толық аяқталған жағдайда су өткізу қабілеті артып, аяқ су жүйесінің тиімділігі едәуір жақсарады. Сонымен қатар, су ысырабы азайып, тұрғындарды тұрақты әрі сапалы аяқ сумен қамтамасыз етуге мүмкіндік туады.
Мұндай инфрақұрылымдық жобалар Шиелі кентінің инженерлік желілерін жаңғыртуға, тұрғындардың тұрмыс сапасын арттыруға және су ресурстарын тиімді пайдалануға бағытталған маңызды бастамалардың бірі болып саналады.
