Жиын барысында Қазақстан Республикасы Бас прокурорының бұйрығымен әділет кеңесшісі Ерлан Алмазұлы Қызылорда қаласының прокуроры қызметіне тағайындалғаны ресми түрде жария етілді. Қала активі жаңа басшының еңбек жолы мен кәсіби тәжірибесі туралы жан-жақты ақпаратпен таныстырылды.
Ерлан Алмазұлы 1984 жылы Қызылорда облысында дүниеге келген. Ол еңбек жолын 2006 жылы Астана қаласы Алматы ауданы прокурорының көмекшісі қызметінен бастаған. Қызмет барысында прокуратура органдарында түрлі жауапты лауазымдарды абыроймен атқарып, құқық қорғау саласында мол тәжірибе жинақтады.
Әр жылдары Астана қаласы Алматы ауданы прокурорының аға көмекшісі, бөлім бастығы, Астана қаласы мен Павлодар облысы прокуратураларының басқарма прокуроры қызметтерін атқарды. Сонымен қатар Павлодар және Байқоңыр қалалары прокурорының орынбасары, Қазақстан Республикасы Бас прокуратурасы департаменті басқармасының аға прокуроры лауазымдарында еңбек етті.
Бұдан бөлек, Көкшетау қаласы мен Сырдария ауданының прокуроры, сондай-ақ Қазақстан Республикасы Бас Прокурорының көмекшісі қызметтерін атқарып, құқықтық тәртіпті қамтамасыз ету мен заңдылықты нығайту бағытында елеулі тәжірибе қалыптастырды. 2024 жылдың сәуір айынан бастап осы уақытқа дейін Астана қаласының «Байқоңыр» ауданының прокуроры қызметін атқарған.
Қала әкімі Нұржан Ахатов жаңа прокурордың кәсіби біліктілігі мен мол тәжірибесіне тоқталып, алдағы жұмысына сәттілік тіледі.
– Ерлан Алмазұлы прокуратура саласының түрлі деңгейіндегі жауапты қызметтерден өткен, мол тәжірибе жинақтаған білікті маман. Заң үстемдігін қамтамасыз ету жолындағы білімі мен тәжірибесін Қызылорда қаласының дамуы мен тұрғындардың құқықтарын қорғауға бағыттап, жаңа қызметінде жоғары нәтижелерге қол жеткізеді деп сенемін. Өз міндетін абыроймен атқарып, қаладағы құқықтық тәртіптің нығаюына зор үлес қосады деп сенімдімін, – деді Нұржан Сәбитұлы.
Жиын барысында қалалық мәслихат төрағасы Ибадулла Құттықожаев та сөз сөйлеп, Ерлан Алмазұлын жаңа қызметімен құттықтап, жауапты лауазымында табысты еңбек етіп, ел сенімін ақтайтынына сенім білдірді.
Кездесу соңында қала активі жаңа прокурорға алдағы қызметіне сәттілік тілеп, құқық қорғау органдары мен жергілікті атқарушы билік арасындағы өзара ынтымақтастықтың алдағы уақытта да жалғасын табатынын атап өтті.
Айта кетейік, бұған дейін Қызылорда қаласының прокуроры қызметін атқарған Жандарбек Сұлтанбекұлы басқа қызметке ауысуына байланысты аталған лауазымнан босатылған болатын.
