Мемлекет тарапынан отандық өндірісті дамытуға, жергілікті кәсіпкерлерді қолдауға және Қазақстандық өнімдердің нарықтағы үлесін арттыруға ерекше көңіл бөлінуде.
Қалада биылғы жылдың 6 айында өңдеу өнеркәсібінде 49,1 млрд теңгенің өнімі өндіріліп, ол өткен жылдың тиісті кезеңімен салыстырғанда 127,5 пайызға артқандығын көрсетті. Бүгінгі күні өңдеу өнеркәсібі бағытында 539 кәсіпорын жұмыс істейді. Онда 6 жарым мыңнан астам адам тұрақты жұмыспен қамтылған. Сондай-ақ, 54 кәсіпорынның өнімі «Қазақстандық тауар өндірушілердің» тізіліміне енгізілген.
Жергілікті өндірушілерді қолдау мақсатында сауда желілерімен жүйелі жұмыстар жүргізілуде. Яғни, 40-қа жуық сауда нысанымен меморандум жасалып, сауда сөрелеріне «Қызылордада жасалған» арнайы белгісі орналастырылуда.
Электрондық сауданы дамыту бағыты да қарқын алған. Қала аумағында «Қазпошта» желісінің 4 супермаркеті және «Керуен Kazpost» мобильді қосымшасы арқылы отандық және шетелдік тауарларды жеткізу қызметі көрсетіліп келеді. Жыл басынан бері осы жүйелер арқылы 56,7 млн теңгені құрайтын 37 800 сәлемдеме қабылданған.
«Бүгінгі талап – өндірілген өнімнің көлемін ғана емес, оның сауда орындарындағы үлесін арттыру, өнімді өткізудің жаңа нарықтарын қалыптастыру және халық арасында Қазақстандық өнімге деген сұранысты күшейту. Сондықтан жергілікті тауар өндірушілерді қолдау жөніндегі іс-шаралар жоспарын әзірлеп, «Қызылордада жасалған» жобасына қосылатын сауда нысандарының санын көбейту қажет. Сонымен қатар, өңірлік кәсіпорындардың өнімдерін маркетплейстерге орналастыруды күшейтіп, кәсіпкерлерге тұрақты түрде түсіндіру және сүйемелдеу жұмыстарын жүргізу керек»,-деді Нұржан Сәбитұлы.
Жиында күн тәртібінен бөлек бірқатар мәселелер талқыланып, жауапты сала басшыларына тапсырмалар жүктелді.
