Қызылорда облысында жатырындағы нәрестесінен айырылған әйел дәрігерлердің жазалануын талап етеді. 36 жастағы келіншек толғағым жетіп, қағанақтағы су кеткенде ақ халаттылар босандырудың орнына, тексерместен үйіме қайтарды дейді. Соның кесірінен іштегі шақалақ тұншығып көз жұмды деп ашынады. Ал аудан дәрігерлерінің құрсақ суы мен кіші дәретті ажырата алмағаны рас па? Жауаптылар неге жазасыз қалды? Абай Нұржанұлы толықтырсын.
Аман-есен дүниеге келген қызымды бауырыма бассам деген арманы орындалмаған Динара Шотанова көз жасына ерік берді. Перзентханаға сап-сау барған келіншек бәріне дәрігерлердің дер кезінде көмек көрсетпегені себеп дейді. Ол құрсақтағы су шыққаннан-ақ мамандарға жүгінген. Баста барғанда сәбиім тірі еді дейді. Бірақ ақ халаттылар қағанақ суын, кіші дәрет деп, толғағы қысқан ананы бақылауға алудан бас тартқан екен.
-Су кеткен жағдайда олар менен тест алу керек екен. Сол тестті алмай мені ауруханадан шығарып жіберді. Сіз кіші дәретке жіберіп қойдыңыз деді де, қарауға ерініп дальше мен сізді бақыладым, сіздбен су кетіп тұрған жоқ деді. Сол тестті алғанда мүмкін балам тірі қалар ма еді, — дейді Динара ШОТАНОВА, Шиелі ауданының тұрғыны
Осылайша екі күн өткен соң Динара Шотанова өз аяғымен перзентханаға тағы барған. Ал құрсақтағы сәбидің жүрегі тоқтағанын сол кезде бір-ақ білдік деп күйінеді.
-Баламның ісіне қатысты дәрігерлер заңды түрде жазасын алуын сұраймын. Осындай дәрігерлердің кесірінен қаншама бала өліп жатыр, бұдан кейін де өлуі мүмкін. Қаншама аналар мен сияқты жылап қалмаса екен, — дейді Динара Шотанова
Ал аудандық ауруханадағылар шақалақтың шетінеуіне нақты себеп болғанын айта алмады. Сондай-ақ Динара Шотанова көмек сұрап келген сәтте, тиісті қызмет көрсетілмегенін мойындайды. Ал жауапты мамандар қатаң сөгіспен құтылыпты.
-Өзіміз тексеру жүргіздік комиися құрып. Комиссия шешімімен сол Шотанованы қабылдауға қатысқан дәрігерлерге әкімшілік тәртіптік шара көрілді. Құқық қорғау органдарының шешіміне байланысты әрі қарайғы әрекеттер солардың шешімімен жүреді, — дейді Алмас Әбілпатта, Шиелі аудандық ауруханасының бас дәрігері
-Жарық дүниені көрместен жатырымда шетінеген шақалақтың өліміне кінәлі дәрігерлер әлі де өз қызметінде жүр,- дейді Динара Шотанова.
Сондықтан ол жауаптылардың заң алдында жауап беруін талап етеді. Ал Шиелі аудандық полиция бөліміндегілер бұл іс бойынша “медицина қызметкерлерінің кәсіби міндетін тиісінше атқармауы” бабымен тергеу жалғасып жатқанын жеткізді.
