Пойызға шығарып салып жатқан сәті.
Бұл – осыдан бір апта бұрын Нұрасыл Әнуарұлын Қызылорданың вокзалынан туыстарының шығарып салған сәті. Отан алдындағы борышымды өтеймін деп өзі сұранған жігітті әкесі жібергісі келмеген. Өйткені ішіміз бір жамандықты сезгендей болды дейді жақындары.
Бейбіт күнде үйіне табытпен оралған сарбаздың өлімі әулеттің қабырғасын қайыстырды. Әкесі марқұм ұлым бір күн бұрын ғана телефон арқылы сөйлескенде денсаулығына шағым айтпаған еді дейді. Бірақ ертесі күні қаралы хабарды естейді. Сондықтан жақындары барлық медициналық тексеруден өтіп, әскерге сап-сау аттанған жас жігіттің ауырып көз жұмды дегеніне күмәнмен қарайды.
-Кеше военкоматтан келгендер бәрі айтты. Балаңызды танимын, бәрі денсаулығы жақсы деді. Енді мынау ғой енді, денсаулығы жақсы адам бір күнде менингит болып өліп қалады деген қайдағы бір нелерді қойып жатыр. Анау камераны көрейік, құлаған жерін десе, көрсетпеді. Жасырып отыр. Енді 9-да түн емес, камера қосылып тұр ғой, — дейді ӘНУАР ҚЫДЫРӘЛИЕВ, НҰРАСЫЛ ӘНУАРҰЛЫНЫҢ ӘКЕСІ
Яғни марқұмның жақындары Нұрасылдың соңғы демі шығар сәтте не болғанын өз көздерімен көргісі келеді. Оның үстіне әскери бөлімдегілер мәйітті бізден бірнеше сағат бойы жасырды деп ашынады. Ал ұлттық қауіпсіздік комитетінің өкілдері кеше сарбаздың өліміне мидың қабынуы себеп деп болжам жасаған. Бірақ бүгін сараптамадан соң тыныс жолдарына инфекция түскені белгілі болды деп отыр.
-Ешқандай жарақат алу немесе ұрған-соққан жарақаттар анықталмаған. Бүгінгі сараптамада қойылған алдын ала диагнозы тыныс алу жолдарының инфекциясы. Сол жөнінде қазір тергеу тағайындалды. Қызметтік тексеру жүргізіліп жатыр, — СЕРІК ТӨЛЕУХАНОВ, АЛМАТЫ ОБЛЫСЫ БОЙЫНША ШЕКАРА ҚЫЗМЕТІ ДЕПАРТАМЕНТІ БАСШЫСЫНЫҢ ОРЫНБАСАРЫ
Небәрі 18 жасында қайтыс болған кенже ұлымның арманы көп еді дейді әкесі. Нұрасыл әскерден соң құқық қорғау органдарында жұмыс істеймін деп мақсат қойған екен. Енді қапыда қайғыға оранған отбасы тергеудің ашық әрі әділ өтуін талап етеді.
САРБАЗ ӨЛІМІНЕ КҮДІК КӨП
