Мерекелік шараға зиялы қауым өкілдері, ақын-жазушылар, мәдениет қызметкерлері, жастар мен аудан тұрғындары қатысты. Кештің ашылу салтанатында аудан әкімінің орынбасары Болатбек Ысмағұлов сөз алып, аудан әкімі атынан мерейтой иесіне жүрекжарды құттықтауын жеткізді. Ол өз сөзінде Қатира Жәленованың ұлттық әдебиетімізге қосқан елеулі үлесін ерекше атап өтіп, ақын поэзиясындағы нәзік лиризм, терең сезім мен адам жанының сырлы иірімдері оқырман жүрегінен орын алғанын тілге тиек етті. Сондай-ақ, мерейтой иесіне арнайы құттықтау хат табысталып, құрмет көрсетілді.
Кештің негізгі бөлімі сұхбат форматында өрбіп, көрермен қауым ақынның өмір жолы мен шығармашылық әлеміне терең бойлады. Халықаралық «Алаш» әдеби сыйлығының иегері, Шиелі ауданының «Құрметті азаматы» Қатира Сыздыққызы өзінің шығармашылық жолы, шабыт бастаулары мен поэзиядағы ізденістері жайлы мазмұнды ойларымен бөлісті. Ақынның жүрек тербетер лирикалық жырлары оқылып, кешке жиналған қауымға ерекше рухани әсер сыйлады.
Сонымен қатар, аудан өнерпаздары ақын сөзіне жазылған әндерді орындап, әдеби-сазды кештің мазмұнын байыта түсті. Әсем әуен мен көркем сөз үндескен бұл кеш көрермендерге айрықша әсер қалдырып, рухани байлықтың мәнін терең сезінуге мүмкіндік берді.
Тағылымды шара барысында қатысушылар қазақ поэзиясының дамуына өлшеусіз үлес қосқан ақынға деген құрметін білдіріп, оның шығармашылығы ұлт руханиятының ажырамас бөлігі екеніне тағы бір мәрте көз жеткізді. Кеш соңында мерейтой иесіне ізгі тілектер айтылып, шығармашылық табыс пен ұзақ ғұмыр тіленді.
@Шиелі ауданы әкімінің баспасөз қызметі
