Шара барысында аудан әкімінің орынбасары Болатбек Ысмағұлов сөз сөйлеп, кітаптың адамзат өркениетіндегі орнына ерекше тоқталды. Ол өз сөзінде:
– Кітап – адамзаттың рухани байлығының алтын қазығы, ұлттың ой-санасын қалыптастыратын басты құндылық. Қай кезеңде болмасын, білім мен парасаттың бастауы – кітап. Сондықтан кітапханашылардың еңбегі қашанда құрметке лайық, – деп атап өтті.
Сонымен қатар, ол кітапхана қызметкерлерінің қоғамдағы ағартушылық рөліне жоғары баға беріп, олардың ұрпақ тәрбиесіндегі орны айрықша екенін жеткізді.
Мерекелік іс-шара аясында кітап саласының дамуына сүбелі үлес қосып жүрген бірқатар кітапхана қызметкерлері мен белсенді оқырмандар аудан әкімінің Алғыс хатымен марапатталды. Бұл – олардың еңбегіне көрсетілген лайықты құрметтің белгісі болды.
Кеш барысында қатысушылар назарына түрлі тақырыптық кітап көрмелері ұсынылып, әдеби-танымдық бағдарламалар ұйымдастырылды. Ашық аспан астындағы форматта өткен шара еркін пікір алмасуға, рухани сұхбат құруға мүмкіндік беріп, кітапсүйер қауымның басын қосты. Қатысушылар кітап оқу мәдениеті мен оның қазіргі қоғамдағы рөлі туралы ой бөлісті.
Сонымен қатар, жиында «Amanat» партиясы аудандық филиалының атқарушы хатшысы Жібек Баймұратова сөз сөйлеп, кітап пен руханиятты дәріптеуге бағытталған мұндай бастамалардың маңыздылығына тоқталды. Ол өз сөзінде жастарды кітап оқуға баулу – ұлт болашағына салынған инвестиция екенін атап өтті. Шара соңында партия атынан бірқатар азаматтарға алғыс хаттар табысталды.
Жалпы, мазмұнды өткен мәдени шара оқырман мен кітапхананы жақындатып, рухани құндылықтарды насихаттайтын маңызды алаңға айналды. Кітапқа деген құрметті арттыру, оқу мәдениетін қалыптастыру бағытындағы мұндай игі шаралар алдағы уақытта да өз жалғасын табады деп күтілуде.
@Шиелі ауданы әкімінің баспасөз қызметі
