Шараны аудан әкімінің орынбасары Болатбек Ысмағұлов ашып, байқауға қатысушыларға сәттілік тіледі. Шара барысында дәстүрлі ән мен жырды қадір тұтқан Әбіләш Әбуовтың шығармашылығына арналған «Әбіләш» кітабының тұсаукесер рәсімі өткізіліп, басылым қалың оқырманға жол тартты.
Дәстүрлі ән мен жырды, сондай-ақ Әбілаш Әбуовтың репертуарындағы шығармашылық мұрасын жастар арасында насихаттау және кеңінен дәріптеу, орындаушылық шеберліктерін жетілдіру, жас әнші-термешілердің шығармашылық қабілеттерін дамыту, дәстүрлі орындаушылық мектептерді сақтап жалғастыру, сондай-ақ өнерлі жастарды қолдау мақсатында ұйымдастырылған байқауға Қызылорда облысынан 18-40 жас аралығындағы 7 талапкер қатысты.
Байқауға ҚР Мәдениет саласының үздігі, «Құрмет» орденінің иегері Ноғайбаева Ақмарал Әлмырзақызы, Қызылорда облыстық филармониясы басшысының орынбасары Бүрлібаев Амандық Қуандықұлы, жыршы-термеші, дәстүрлі әнші Баймағамбетов Сәрсенбек Сәбекұлы қазылық етті.
Байқау талаптары бойынша қатысушылар І кезеңде Әбілаш Әбуовтың «Ризамын өнерге» әнін орындады, ІІ кезеңде Нартай Бекежановтың шығармаларынан бір туынды орындаса, ал ІІІ кезеңде қатысушы өзінің дәстүрлі ән мектебінен бір шығарманы орындады.
Қазылар алқасының шешімімен Бас жүлдені шиелілік Мұхаммедәлі Бекпейісов иеленсе, І орынды шиелілік Нұртілек Ақтаев, ІІ орынды қызылордалық Қуаныш Алғазиев, ІІІ орынды қызылордалық Дильназ Ташмұхаммед жеңіп алса, Әбілаш Әбуов атындағы арнайы жүлдемен шиелілік Сәбит Әбжапбаров марапатталды.
