Аталған шара білім беру саласындағы жаңашылдық пен шығармашылықты ұштастырып, қатысушыларға өз мүмкіндіктерін жан-жақты көрсетуге зор мүмкіндік берді.
Бұл байқау – тек кәсіби жарыс қана емес, сонымен қатар білім мен тәжірибенің, дәстүр мен заманауи технологиялардың үйлесім тапқан алаңы болды. Қатысушылар өз шеберліктерін дәлелдеп қана қоймай, цифрлық құралдарды, оның ішінде жасанды интеллект мүмкіндіктерін тиімді пайдалана алатындығын көрсетті. Бұл өз кезегінде қазіргі білім беру жүйесіндегі жаңа бағыттардың нақты көрінісіне айналды.
Байқау бірнеше кезеңнен тұрды. «Менің ЖИ әлемім» кезеңінде қатысушылар өздерінің кәсіби жолын таныстырып, цифрлық технологияларға деген көзқарастарын ортаға салды. Ал «Үздік сабақ фрагменті» бөлімінде өндірістік оқытудағы инновациялық әдіс-тәсілдер көрсетіліп, заманауи білім беру үрдісіндегі тың тәжірибелер ұсынылды. «Шығармашыл ұстаз» кезеңі қатысушылардың креативті ойлау қабілеті мен тапқырлығын айқындайтын алаңға айналды.
Байқау қорытындысы бойынша жеңімпаздар анықталып, үздіктер марапатталды.
І орынды «Ауыл шаруашылығын механикаландыру» мамандығы бойынша өндірістік оқу шебері Бекмағамбетов Ардақ Мұратұлы иеленді.
ІІ орын «Электр жабдықтары» мамандығы бойынша өндірістік оқу шебері Тұрғанбек Шерхан Үсенханұлына бұйырса,
ІІІ орынды «Тігін өндірісі және киімдерді үлгілеу» мамандығы бойынша өндірістік оқу шебері Ертаева Ақмарал Ануарбековна еншіледі.
Іс-шара соңында барлық қатысушыларға «AMANAT» партиясы Шиелі аудандық филиалының Алғыс хаттары табысталып, бастауыш кәсіподақ ұйымы тарапынан бағалы сыйлықтар ұсынылды. Сонымен қатар, байқауды ұйымдастыруға үлес қосқан бірлестік жетекшілері мен кәсіподақ ұйымының төрағасы Шиелі аудандық Қоғамдық даму бөлімінің Алғыс хаттарымен марапатталды.
Аталған байқау – өндірістік оқыту шеберлерінің кәсіби дамуға деген ұмтылысының, үздіксіз ізденісінің және ұстаздық шеберлігінің айқын дәлелі. Мұндай игі бастамалар алдағы уақытта да жалғасын тауып, білім сапасын арттыруға, бәсекеге қабілетті мамандар даярлауға тың серпін беретіні анық.
