Мәжіліс барысында аудан көлеміндегі жылу беру маусымының қорытындылары жан-жақты талқыланып, алдағы қысқы кезеңге дайындық мәселелері кеңінен қаралды. Сала мамандары тарапынан атқарылған жұмыстар сараланып, жүйелі түрде жүзеге асырылған шаралар мен орын алған мәселелерге талдау жасалды. Сонымен қатар, алдағы жылыту маусымында туындауы мүмкін қауіптердің алдын алу бағытындағы нақты ұсыныстар айтылды.
Аудан көлемінде инженерлік-инфрақұрылымдық жүйелерді дамыту бағытында ауқымды жұмыстар кезең-кезеңімен іске асырылып келеді. Атап айтқанда, 2025 жылы жалпы құны 1 млрд 622 млн теңгені құрайтын жобалар аясында Ортақшыл және 22 бекет елді мекендері табиғи газға қосылды. Бұдан бөлек, жыл соңында 467,9 млн теңгеге 21 бекет және Жансейіт елді мекендері толықтай көгілдір отынға қол жеткізді. Нәтижесінде аудан бойынша 1 кент пен 17 елді мекен тұрғындарының табиғи газды тұтыну деңгейі 81 пайызға жетіп отыр. Бұл көрсеткіш – халықтың тұрмыс сапасын арттыруға бағытталған жүйелі жұмыстың нақты нәтижесі.
Жиын барысында аудан әкімі әлеуметтік маңызы бар нысандардың қысқы маусымға дайындығы ерекше назарда болуы тиіс екенін атап өтті. Әсіресе білім беру, денсаулық сақтау және мәдениет салаларына қарасты мекемелердің жылыту жүйелері толық тексеріліп, қажетті жөндеу жұмыстары уақытылы жүргізілуі қажет екені ескертілді. Сонымен қатар, тұрғындардың қауіпсіздігі мен әл-ауқатын қамтамасыз ету – жергілікті атқарушы органдардың басты міндеті екені баса айтылды.
Аппараттық мәжіліс қорытындысы бойынша аудан әкімі жауапты сала басшыларына бірқатар нақты тапсырмалар жүктеді. Атап айтқанда, алдағы жылыту маусымына дайындық жұмыстарын сапалы ұйымдастыру, инженерлік желілердің үздіксіз жұмысын қамтамасыз ету, сондай-ақ төтенше жағдайлардың алдын алу бағытындағы іс-шараларды күшейту міндеттелді. Берілген тапсырмалардың орындалуы қатаң бақылауда болатыны ескертілді.
Жалпы, аудан көлемінде жүргізіліп жатқан инфрақұрылымдық жобалар мен дайындық жұмыстары алдағы қысқы маусымды тұрақты әрі қауіпсіз өткізуге бағытталған.
@Шиелі ауданы әкімінің баспасөз қызметі
