Айта кетейік, Қызылорда қаласында өткен облыстық әскери-патриоттық сайыста Жаңақорған ауданының намысын қорғаған жас сарбаздар жоғары дайындық деңгейін көрсетіп, командалық есеп бойынша ІІІ орынды иеленді. Сайыс барысында қатысушылар әскери дайындық, саптық жүріс, зияткерлік кезеңдер, спорттық сындар мен патриоттық бағыттағы тапсырмалар бойынша өзара бақ сынады.
Аудан абыройын асқақтатқан 15 оқушы өз жетекшілерімен бірге аудан әкімдігі тарапынан алғыс хаттармен және арнайы марапаттармен марапатталды. Сонымен қатар, үздік нәтиже көрсеткен 7 оқушы республикалық кезеңге жолдама алып, алдағы уақытта Қызылорда облысының намысын қорғайтын болады.
Салтанатты шара барысында аудан әкімінің орынбасары Нариман Жахудаев жастардың жетістігі – аудан мерейі екенін атап өтіп, жас өрендерге республикалық кезеңде сәттілік тіледі. Сондай-ақ, өскелең ұрпақтың бойында отансүйгіштік қасиетті қалыптастыруда мұндай әскери-патриоттық сайыстардың маңызы зор екенін жеткізді.
Өз кезегінде сайысқа қатысқан оқушылар мен жетекшілер көрсетілген қолдау үшін ризашылықтарын білдіріп, алдағы жарыстарда да аудан абыройын жоғары деңгейде қорғауға дайын екендерін айтты.
Айта кету керек, «Айбын» әскери-патриоттық жиыны жастардың әскери салаға қызығушылығын арттыруға, тәртіп пен жауапкершілікті қалыптастыруға, сондай-ақ патриоттық рухты нығайтуға бағытталған маңызды жобалардың бірі болып саналады.
