Күн тәртібінде үш мәселе қаралды. Алдымен аудан әкімінің міндетін атқарушы Жалғас Сүйеубаев есепті мерзімде партияның сайлауалды бағдарламасын іске асырудың өңірлік Жол картасының Қазалы ауданы бойынша орындалуы жөнінде есеп берді. Бұдан соң аудандық филиалдың Атқарушы хатшысы Нұрғиса Жалғасбаев партия филиалымен жыл басынан бері атқарылған жұмыстар туралы баяндама жасады.
Жиында қаралған негізгі мәселе 2025 жылдың 28 қыркүйегінде өтетін Қазалы ауданы әкімінің сайлауына «AMANAT» партиясы атынан кандидат ұсыну туралы болды. Делегаттардың дауыс беру қорытындысымен Қазалы ауданының әкімі лауазымына «AMANAT» партиясы Қызылорда облыстық филиалының төрағасы Есмаханов Алмасбек Әбілқасымұлының кандидатурасы бекітілді.
Конференция барысында партияның аудандық филиалының төрағасы Ғазиз Әліш Мемлекет басшысының бастамасымен қолға алынған әкімдерді тікелей сайлау жүйесінің елді демократияландыру жолындағы тарихи қадам екенін атап өтті:
«Әкімдерді тікелей сайлау – саяси реформалардың маңызды бөлігі. Соның нәтижесінде соңғы үш жылда еліміздегі ауыл әкімдерінің 72 пайызы жаңадан сайланды. Мемлекет басшысы Қасым-Жомарт Тоқаев 2024 жылғы Жолдауында аудан әкімдерінің де халық тікелей таңдауымен сайланатынын мәлімдеген болатын. Бұл ел дамуына серпін беретін маңызды өзгеріс», – деді ол.
Мұнан соң партия атынан ұсынылған кандидат Алмасбек Әбілқасымұлы Есмаханов сөз алып, артылған сенім үшін партияластарға алғыс білдіріп, алдағы сайлауда жүктелген міндетті абыроймен атқаруға жұмыс жасайтынын атап өтті.
Сондай-ақ, аудандық партия филиалы Саяси кеңесі Бюросының мүшесі, қоғам қайраткері Самұрат Имандосов пен аудандық ардагерлер кеңесінің төрағасы Оразғали Бекбанов үміткерге сәттілік тіледі.
